इजरायलमाथि टर्कीका राष्ट्रपतिको आक्रोश, ‘हात भाँचिदिने’ चेतावनी
टर्कीका राष्ट्रपति रेचेप तैय्यप अर्दोआनले इजरायलको ‘हात भाँचिदिने’ चेतावनी दिएका छन् । नमाज पढिरहँदा मस्जिद–ए–अक्साभित्र छिरेर प्यालेस्टाइनीहरूलाई आक्रमण गरेपछि अहिले इजरायल र गाजाबीच लडाइँ छेडिएको छ।
इजरायलले मानवीय हताहती हुनेगरी अन्धाधुन्ध हमला गरेपछि अर्दोआनले यस्तो चेतावनी दिएका हुन् । इजरायलविरुद्ध विश्वका सबै देशले कडा रवैया अपनाउनुपर्ने भन्दै उनले अरूहरू मौन रहेपनि टर्कीले आवाज उठाइरहने बताएका छन्।
पार्टी पदाधिकारीहरूलाई सम्बोधन गर्दै अर्दोआनले बैतुल मोकद्दस (मस्जिद–ए–अक्सा) मुसलमानका साथै इसाई र यहूदीहरूको पनि पवित्र स्थल भएको, तर त्यहाँ इजरायलले अमानवीयताको सबै हद पार गरेका आरोप लगाएका छन् ।
अर्दोआनले प्यालेस्टाइनीको पक्ष र इजरायलको विपक्षमा उभिन विश्वभरका नेतासँग बातचित गरिरहेका छन् । यसअघि मलेसियाका पूर्व–प्रधानमन्त्री डा। मोहम्मद महाथिरले इजरायलविरुद्ध सबै मुस्लिम देशहरूलाई एकतावद्ध हुन आग्रह गरेका थिए ।
इस्लामिक देशहरूको संगठन अर्गनाइजेशन अफ इस्लामिक कोअपरेशन (ओआइसी) ले पनि इजरायल–गाजा हिंसाबारे छलफल गर्न आज बस्नेगरी आपतकालीन बैठक डाकेको छ । आजै संयुक्त राष्ट्रसंघीय सुरक्षा परिषदको बैठक पनि यही विषयमा केन्द्रित हुनेगरी बस्दैछ।
