टेलिभिजनमा मास्क लगाएर समाचार पढेको त यताका लागि अद्भुत दृश्य हो

सार्वजनिक यातायातमा केही एसियन मूलका व्यक्तिले मास्क लगाउने गरेको पहिले पनि देखिन्थ्यो । अहिले अलिकति बाक्लो छ । तर सड़कमा, शपिङ एरियाहरूमा, पार्कमा अझै पनि मास्क लगाउने चलन बसिसकेको छैन । शायद ‘कल्चर’ नै यस्तो भएर पनि हुन सक्छ ।

हामीले अनावश्यक मास्क प्रयोग गऱ्यौं भने हस्पिटलमा स्वास्थ्यकर्मीलाई अभाव हुन सक्छ भन्नेसम्मको सेन्टिमेन्ट केहीमा हुने रहेछ । खासमा यता मास्क लगाउनेदेखि कुन तहको पिपिई लगाउने भन्नेसम्मको निर्णय स्वास्थ्य क्षेत्रमा अध्ययन अनुसन्धान गर्ने निकायहरूले दिने सल्लाहमा भर पर्छ । सरकारले पनि त्यही सल्लाहलाई आधार मान्दछन् । सर्जिकल या कपड़ाको मास्कले कोरोनाभाइरसलाई रोक्न सक्छ भन्ने प्रमाणित नभएकाले पनि यसको प्रयोग नभएको हुनुपर्छ । अर्को कुरा मास्कलाई फोहोर हातले एकपल्ट छोएपछि त्यो ‘कन्ट्यामिनेटेड’ हुन्छ र हरेक पल्ट छोएपछि बदलिरहन पनि असम्भव हुन्छ । अनावश्यक मास्कको प्रयोगले पुऱ्याउन सक्ने वातावरणीय असर त छँदै छ ।

यति लामो गन्थन तपाईंले मास्क नलगाउनुस् भन्नका लागि लेखिएको होइन । यता यस्तो हुन्छ भन्ने सूचना साटेको मात्रै । हरेक देश, समाज र शहरका आफ्नै विधान र बुझाइ हुन्छन् ।

आफ्नो आफ्नो देशको स्वास्थ्य-सल्लाह पालना गरौँ, सतर्क र सजग रहौं अनि मिलेर यो भाइरसलाई पराजित गरौँ । नयाँ वर्षको शुभकामना !