अमेजनले टिकटक हटाउन भन्दै कर्मचारीलाई किन पठायो गलत मेल ?
अमेजनले आफ्ना कर्मचारीहरूलाई कम्पनीको इमेल खोल्न प्रयोग भएको कुनै पनि मोबाइलबाट भिडियो साझा गर्ने एप टिकटक हटाउनु भनी गल्तीवश इमेल पठाइएको बताएको छ । शुक्रवार सबेरै कर्मचारीहरूलाई पठाइएको एउटा आन्तरिक निर्देशनमा “सुरक्षा खतराका कारण“ उक्त एप हटाउनुपर्ने भनिएको थियो । डेटाहरू चीनलाई साझा गर्नसक्छ भन्ने डरका कारण एउटा चिनियाँ कम्पनीको स्वामित्व रहेको उक्त एप अहिले धेरैको सूक्ष्म निगरानीमा परेको छ ।
टिकटकले चाहिँ अमेजनको चिन्ता आफूले बुझ्न नसकेको बताएको छ । अमेजनका एकजना प्रवक्ताले शुक्रवार बिहान आफ्ना केही कर्मचारीहरूलाई भुलवश उक्त इमेल गएको तर टिकटकलाई लिएर हाललाई कुनै पनि नीति परिवर्तन नभएको बताए । तर शुक्रवार सबेरै पठाइएको र धेरै समाचार संस्थाहरूले देखेको उक्त आन्तरिक निर्देशनमा मोबाइलबाट त्यो एप हटाउनै पर्नेमा जोड दिइएको थियो ।
“सुरक्षा खतराका कारण अमेजनको इमेल प्रयोग गरिने मोबाइलमा टिकटक चलाउन अब अनुमति छैन। यदि तपाईँको मोबाइलमा टिकटक छ भने अमेजनको इमेल मोबाइलमा चलाउनका लागि जुलाई १० भित्र त्यसलाई हटाउनुस्,“ त्यसमा भनिएको थियो । टिकटकले उक्त इमेल बाहिर आउनुअघि अमेजनबाट कुनैखाले सम्पर्क नभएको जनाएको छ ।
चीन बाहिर टिकटक बेइजिङमा आधारित बाइटडान्स कम्पनीले फैलाएको हो । यो एप कोरोनाभाइरसका कारण विश्वभरि लागेको लकडाउनका बेला थप चर्चित भएको छ । एउटा अनुसन्धान कम्पनीका अनुसार यस वर्षको पहिलो तीन महिनामा मात्र ३१ करोड ५० लाख मानिसहरूले उक्त एप डाउनलोड गरेका थिए । अमेरिकी विदेशमन्त्री माइक पोम्पेओ र एकजना अस्ट्रेलियाली सांसदले हालै उक्त एपको मुख्यालय चीनमा रहेकाले डेटा र गोपनीयताका हिसाबले त्यसलाई थप निगरानी गर्नुपर्ने बताएका थिए ।
पोम्पेओले विदेश मन्त्रालयका कर्मचारीहरूलाई उक्त एप डाउनलोड गर्न प्रतिबन्ध लगाइदिएका थिए र अमेरिकामा पनि त्यसलाई प्रतिबन्ध लगाउनसक्ने बताएका थिए । भारत र चीनबीच तनाव बढेपछि गत जुन अन्त्यमा भारतले टिकटकसहित विभिन्न ५९ वटा मोबाइल एपमा प्रतिबन्ध लगाएको थियो।
