प्रदेश एकमा १० जना एमाले सांसद एकीकृत समाजवादीका पक्षमा

विराटनगर । प्रदेश एकमा नेकपा एमालेका १० सांसदले पार्टी परित्याग गरी नेकपा (एकीकृत समाजवादी) रोजेका छन् । बुधबार निर्वाचन आयोगको प्रदेश कार्यालयमा एमालेका राजेन्द्र राई, राजन राई, उपेन्द्र घिमिरे, सावित्रा रेग्मी, खिनु लङ्वा लिम्बू, गणेश काङ्माङ, कृष्णकुमारी राई, पदमकुमारी गुरुङ, सुनिता चौधरी र सरिता थापाले एकीकृत समाजवादीमा सनाखत गरेका हुन् ।

उनीहरुको सनाखतसँगै मुख्यमन्त्री भीम आचार्य अल्पमतमा परेका छन् । सरकार जोगाउन एमालेलाई ४७ मत आवश्यक पर्छ । ९३ सदस्यीय प्रदेशसभामा हाल कायम संख्या ९२ छ । यसमध्ये १० जनाले समाजवादी रोजेपछि एमालेको सांसद संख्या ४१ मा झरेको छ । प्रदेशसभामा कांग्रेससँग २१, माओवादीसँग १५ र जनता समाजवादीसँग ३ जना सांसद छन्।