उत्तर कोरियाद्वारा पूर्वी सागरमा दुईवटा बलिस्टिक क्षेप्यास्त्र प्रहार गरेको दक्षिणको दावी
उत्तर कोरियाले पूर्वी सागरमा दुईवटा बलिस्टिक क्षेप्यास्त्र प्रहार गरेको दक्षिण कोरियाको सेनाले पुष्टि गरेको छ । जापानले पनि केही कुरा प्रहार गरिएको र त्यो बलिस्टिक क्षेप्यास्त्र हुनसक्ने जनाएको छ ।
जापानका प्रधानमन्त्री योशिहिदे सुगाले क्षेप्यास्त्र प्रहारलाई अतिशयोक्ति भन्दै त्यसले उक्त क्षेत्रमा शान्ति र सुरक्षालाई खतरामा परेको टिप्पणी गरेका छन् । यो साता उत्तर कोरियाले क्षेप्यास्त्र परीक्षण गरेको दोस्रो पटक हो ।
अहिले प्रहार गरिएका क्षेप्यास्त्रको लक्ष्य वा उडान दूरीबारे स्पष्ट जानकारी छैन । तर दक्षिण कोरियाको सेनाको सर्वोच्च निकायले आफ्नो सेना अमेरिकासँगको सहकार्यमा पूर्ण तयारीको अवस्थामा बसेको जनाएको छ ।
बलिस्टिक क्षेप्यास्त्रको परीक्षण उत्तर कोरियाको परमाणु गतिविधि नियन्त्रण गर्ने संयुक्त राष्ट्रसङ्घीय सङ्कल्प प्रस्तावविरुद्ध छ । गत सोमवार पनि उत्तर कोरियाले लामो दूरीको क्रुज क्षेप्यास्त्र परीक्षण गरेको थियो ।
उक्त क्षेप्यास्त्रले जापानसम्म मार हान्न सक्ने बताइएको छ । प्योङ्याङले उक्त क्षेप्यास्त्रलाई ठूलो महत्त्वको रणनीतिक अस्त्र भनेको छ । विज्ञहरूका अनुसार उक्त क्रूज क्षेप्यास्त्रले सम्भवतः परमाणु युद्धशीर्ष बोक्न सक्छ ।
राष्ट्रसङ्घीय सुरक्षा परिषद्ले क्रुज क्षेप्यास्त्रको परीक्षण गर्न रोक्दैन । खाद्यान्नको अभाव तथा चरम आर्थिक सङ्कट खेपिरहेको उत्तर कोरियाले कसरी अस्त्र निर्माण गर्न पैसा जुटाइरहेको छ भनेर प्रश्न उठ्ने गरेको छ ।
कोरोनाभाइरस महामारी फैलिएदेखि उक्त राष्ट्र एक वर्षभन्दा बढी समयदेखि बाँकी संसारबाट अलग्गिएको छ। उसले चीनसँगको सीमा पनि बन्द गरेको छ । चीनका विदेशमन्त्रीले आफ्ना दक्षिण कोरियाली समकक्षीसँग बुधवार सोलमा वार्ता गर्न लागेका छन् ।
उत्तर कोरियाको अस्त्र कार्यक्रम तथा निसस्त्रीकरणबारे अवरुद्ध संवाद पनि उनीहरूको वार्ताको विषय हुने अनुमान गरिएको छ । यो वर्ष मार्चमा प्योङ्याङले प्रतिबन्ध उल्लङ्घन गर्दै बलिस्टिक क्षेप्यास्त्र परीक्षण गर्दा अमेरिका, जापान र दक्षिण कोरियाले त्यसको चर्को आलोचना गरेका थिए।
