हाइटीका प्रधानमन्त्रीलाई देश छाड्न रोक
हाइटीमा जुलाई पहिलो साता राष्ट्रपति जोभनेल मोइजको हत्यामा संलग्न रहेको हुनसक्ने विषयबारे भइरहेको अनुसन्धानकाबीच प्रधानमन्त्री एरिअल आङ्ग्रीलाई देश छाड्नमा रोक लगाइएको छ ।
एकजना अभियोजनकर्ताले आङ्ग्रीविरुद्ध अभियोग लगाउन खोजिरहेका छन् । उनलाई हत्याका मुख्य सन्दिग्ध जोसेप फेलिक्स बाडिओसँगको सम्बन्ध स्पष्ट पार्न भनिएको छ ।
रेकर्डहरूका अनुसार ती दुईबीच हत्यापछि पटक–पटक टेलिफोन संवाद भएको देखिएको अभियोजनकर्ताहरूले बताएका छन् । मोइजलाई गत जुलाई ७ तारिखमा आफ्नै निवासमा बन्दुकधारीहरूले आक्रमण गरेका थिए ।
उनको मृत्युले हाइटीमा राजनीतिक सङ्कट निम्त्यायो जुन एक महिनाअघि दक्षिणी भागमा गएको ठूलो भूकम्पका कारण झनै बढ्यो । सोमबार आङ्ग्रीले एउटा पत्रमार्फत प्रमुख अभियोजनकर्ता बेड–फोर्ड क्लोडलाई गम्भीर प्रशासनिक गल्ती गरेको आरोप लगाउँदै पदबाट बर्खास्त गरेका छन् । पछि उनले अर्का व्यक्तिलाई त्यो पदमा नियुक्त गरे। तर मङ्गलबार क्लोडले प्रमुख अभियोजनकर्ताकै रूपमा काम गरे ।
उनले मोइजको हत्याको मुद्दा हेरिरहेका न्यायाधीशसँग प्रधानमन्त्रीलाई घटनाको सन्दिग्धका रूपमा अभियोग लगाउन आग्रह गरेका छन् । हाइटीबारे जानकारहरूका अनुसार प्रधानमन्त्रीसँग अभियोजनकर्तालाई पदमुक्त गर्ने अधिकार छैन ।
कैयौँ धम्कीका कारण हेइटीको न्याय मन्त्रालयले क्लोडलाई थप सुरक्षाकर्मी उपलब्ध गराउन निर्देशन दिएको छ।५३ वर्षका मोइज सन् २०१७ देखि उत्तर अमेरिकी महादेशको सबैभन्दा गरिबमध्येको देश हाइटीका राष्ट्रपति थिए ।
भ्रष्टाचारको आरोपको सामना गर्नु परेको र राजधानीसहित देशका विभिन्न सहरहरूमा यसै वर्षको सुरुमा प्रदर्शनहरू भइरहेकाले उनको कार्यकाल विवादमुक्त थिएन ।
सन् २०१९ को अक्टोबरमा नै चुनाव गर्नुपर्ने भए तापनि विवादहरूका कारण त्यसमा विलम्ब भइरहेको थियो र उनले उर्दीका भरमा शासन चलाइरहेका थिए । प्रस्तावित संवैधानिक परिवर्तनका लागि उनले सेप्टेम्बरमा जनमत सङ्ग्रह गराउने योजना गरेका थिए ।
हाइटीको प्रहरीले उनको हत्यामा संलग्न अधिकांश भाडाका हमलाकारी कोलम्बियाका नागरिक रहेको र दुईजना संयुक्त राज्य अमेरिकाको नागरिकता भएका व्यक्ति रहेको जनाएको थियो ।
आक्रमणकारीका रूपमा आरोपितमध्ये ४४ जनालाई पक्राउ गरिसकिएको छ। ती मध्ये १८ जना कोलम्बियाका अवकाश प्राप्त सैन्य अधिकारी हुन् । तीनजना सन्दिग्ध हमलाकारीको प्रहरीसँगको भिडन्तमा ज्यान गएको बताइएको छ ।