सुदूरपश्चिम प्रदेश विपद् व्यवस्थापन गुल्ममा कार्यरत प्रहरी जवानद्वारा आफैंमाथि गोली प्रहार
सुदूरपश्चिम । कञ्चनपुरमा एकजना प्रहरी जवानले आफैंलाई गोली हानेका छन् । सुदूरपश्चिम प्रदेश विपद् व्यवस्थापन गुल्म कञ्चनपुरमा कार्यरत प्रहरी जवान वकिल विष्टले बुधबार राति आफैंलाई गोली हानेका हुन् ।
बुधबार बेलुका साढे आठ बजेको समयमा ड्युटी खटिएका बिष्टले आफैंमाथि राइफलको गोली हानेर गम्भीर घाइते भएका छन् । उनी हातहतियार राखिने स्थानमा ड्युटीमा रहेका थिए ।
जिल्ला प्रहरी कार्यालय कञ्चनपुरका डीएसपी उमेशराज जोशीले गोली विष्टको दाहिने कानभन्दा माथि लागेको र उनको अवस्था गम्भीर रहेको जानकारी दिए ।
घाइते जवान वि ष्टलाई उपचारका लागि महेन्द्रनगरस्थित महाकाली प्रादेशिक अस्पतालमा भर्ना गरिएको छ । यसअघि पुस १२ गते जिल्ला प्रहरी कार्यालय कञ्चनपुरमा कार्यरत प्रहरी जवान चक्रप्रसाद न्यौपानेले आफैँमाथि गोली हानेर आत्महत्याको प्रयास गरेका थिए । गम्भीर घाइते न्यौपाने अहिले उपचाररत छन्।
