कानुन व्यवसायीमाथि भएको आक्रमणलाई अन्तर्राष्ट्रियकरण गर्ने अर्यालको चेतावनी
काठमाडौं । अधिवक्ता ओमप्रकाश अर्यालले कानुन व्यवसायीमाथि भएको आक्रमण मानव अधिकार र अन्तर्राष्ट्रिय कानुनको पनि विषय भएकाले यस विषयलाई अन्तर्राष्ट्रियकरण गर्ने चेतनवी दिएका छन् ।
बिहीबार नेपाल बार एसोसिएसन परिसरमा विरोध प्रदर्शनपछि सम्बोधन गर्दै अर्यालले यो मुद्दा राष्ट्रसंघका निकायमा लैजाने चेतावनी दिएका हुन् । उनले कानुन व्यवसायीमाथि बल प्रयोग गर्नेहरुले माफी नमागे यसलाई अन्तर्राष्ट्रियकरण गर्ने बताए ।
उनले भने,‘हामी यसविरुद्ध जाहेरी दर्ता गर्न जान्छौं । दर्ता भएन, अनुसन्धान भएन, कारबाही गरेन र मानव अधिकार आयोगले पनि हेरेन हेरेन भने हामीले अन्तर्राष्ट्रिय क्षेत्राधिकारमा लान्छौँ । यदि तिमीहरुको नाम किटानी गरेर हामीले दियौँ भने तिमीहरुको वृत्ति विकास, आगामी नियुक्तिहरु, वैदेशिक भ्रमणहरु सबै दाग लाग्नेछ । भेटिङको प्रक्रियामा लानेछौँ ।’
नेपाल बार एसोसिएसनले शुक्रवार पनि सर्वोच्च अदालतमा धर्ना दिएको छ । धर्नाका क्रममा प्रहरीले बल प्रयोग गर्दा नेपाल बार एसोसिएसनका अध्यक्ष चण्डेश्वर श्रेष्ठसहित अधिवक्ताहरु प्रकाश महर्जन, कपिल पोखरेल, निकेश श्रेष्ठ, युवराज बञ्जाडेलगायत एक दर्जन घाइते भएका छन् ।
