प्रधानमन्त्री र प्रचण्डबीच सरकारलाई पूर्णता दिनेबारे छलफल
काठमाडौँ । प्रधानमन्त्री शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल प्रचण्डबीच भेटवार्ता भएको छ । शनिबार बिहान प्रधानमन्त्री देउवालाई भेट्न अध्यक्ष प्रचण्ड प्रधानमन्त्री निवास बालुवाटार पुगेका थिए ।
भेटमा सरकारलाई पूर्णता दिने विषयमा छलफल भएको छ । माधवकुमार नेपाल र महन्थ ठाकुर नेतृत्वको पार्टी दर्ता प्रक्रिया पूरा भएकाले अब केही दिनभित्रै मन्त्रिपरिषद्ले पूर्णता पाउने बताइएको छ । यसै सन्दर्भमा दुई नेताबीच छलफल भएको हो ।
असार २९ मा प्रधानमन्त्री पदको शपथ लिएका देउवाले एक सातामै संसदमा विश्वासको मत लिएपनि अहिलेसम्म मन्त्रिपरिषद्लाई पूर्णता दिन सकेका छैनन् । माधवकुमार नेपाल नेतृत्वको नेकपा (एकीकृत समाजवादी) ले सरकारमा सहभागी हुने निर्णय गरिसकेको छ । ठाकुर नेतृत्वको लोसपा सरकारमा सहभागी हुने वा नहुने टुंगो लागेको छैन ।