दलीय संकीर्णताबाट बाहिर निस्केर संक्रमणकालीन न्यायको विषय टुंग्याउनुपर्छः महामन्त्री थापा
काठमाडौं । नेपाली कांग्रेसका महामन्त्री गगन थापाले दलहरूले तत्कालको नाफा घाटा नहेरी शान्ति प्रक्रिया र संक्रमणकालीन न्यायको विषय टुंग्याउनुपर्ने बताएका छन् ।
मंगलबार पूर्वप्रधानमन्त्री एवं कांग्रेस नेता गिरिजाप्रसाद कोइरालाको स्मृति दिवसमा आयोजित कार्यक्रममा महामन्त्री थापाले शान्ति प्रक्रियालाई कुनै पनि बहाना लम्ब्याउन नहुने बताएका हुन् ।
उनले यसलाई लम्ब्याएर जटिल बनाउन नहुने बताए । उनले भने, ‘दलीय संकीर्णता र तत्कालको नाफा घाटा भन्दा बाहिर निस्केर यो विषयलाई सम्बोधनको प्रयास गर्नुपर्छ, हामीसँग समयको सुविधा छैन ।यो या त्यो नाममा लम्ब्यायौं भने अझै यो जटिल बन्दै जान्छ र भविष्यमा अझै अप्ठेरो सिर्जना गर्छ र अन्यायपूर्ण पनि हुन्छ ।’
संक्रणकालीन न्यायको विषय टुंग्याउन ढिलो भइसकेको भन्दै थापाले नेकपा एमालेलाई पनि सहकार्यमा आउन आग्रह गरे । महामन्त्री थापाले संक्रमणकालीन न्यायको विषय सम्बोधन गर्दा पीडितको भावना अनिवार्य बुझ्नुपर्ने र अन्तर्राष्ट्रिय कानुन र मान्यता विपरीत भए, नभएको पनि ख्याल गर्नुपर्ने बताए ।
