राष्ट्रिय सभा उपनिर्वाचनको उम्मेदवारी मनोनयन आज
काठमाडौं । बागमती प्रदेशमा रिक्त राष्ट्रिय सभा सदस्य पदको उपनिर्वाचनमा लागि आज उम्मेदवारी मनोनयन हुँदैछ । हेटौंडास्थित निर्वाचन अधिकृतको कार्यालयमा बिहान १० देखि अपरान्ह ४ बजेसम्म उम्मेदवारी दर्ता गरिने निर्वाचन आयोगले जनाएको छ ।
नेकपा एमालेको केपी ओली समूहमा प्रवेश गरेका रामबहादुर थापालाई माओवादी केन्द्रले कारबाही गरेपछि उनको बागमती प्रदेशमा एउटा पद रिक्त भएको हो । त्यसको पूर्तिका लागि जेष्ठ ६ गते मतदान हुनेछ । प्रदेश सभा सदस्य र पालिका प्रमुख र उपप्रमुखले मतदान गर्ने छन् ।
बागमती प्रदेशमा १ सय १० सांसद र २३८ पालिका प्रमुख उपप्रमुख गरी कुल ३ सय ४८ जना मतदाताले मतदान गर्न पाउने छन् । विपक्षी गठबन्धन नेपाली कांग्रेस, माओवादी केन्द्र र नेकपा एमालेकै नेपाल पक्षले खिमलाल देवकोटालाई उम्मेदवार बनाउने निर्णय गरेको छ ।
सत्तारुढ दल एमालेले मनोनयन दर्ताको दिनसम्म पनि उम्मेदवार चयन गर्न सकेको छैन । सुरुमा थापालाई उम्मेदवार बनाउने एमालेको तयारी थियो । तर एमालेको नेपाल पक्ष विपक्षी गठबन्धनमा उभिएपछि थापा उम्मेदवार बन्न हच्किएको पाइएको छ ।
जित सुनिश्चित भएपछि मात्र उम्मेदवार बन्ने थापाले अडान लिएपछि एमाले स्थायी कमिटीको बिहीबारको बैठकले कुनै निर्णय लिन सकेको थिएन । त्यसका लागि एमालेका स्थायी कमिटी बैठक आज बस्दैछ ।