कांग्रेसले संसदीय प्रक्रिया सुरु भएपछि मात्र सत्ता समीकरणबारे निर्णय लिने
काठमाडौं । नेपाली कांग्रेसको संसद सुरु भएपछिमात्र सत्ता समीकरणको सम्बन्धमा निर्णय लिने भएको छ । बिहीबार पार्टी सभापति शेरबहादुर देउवाको निवास बुढानिलकण्ठमा बसेको पार्टी पदाधिकारी बैठकले संसदीय प्रक्रिया सुरु भएपछि सत्ता समीकरण लगायतका आफ्नो भूमिकाको बारेमा निर्णय लिने निष्कर्ष निकालेको हो ।
कांग्रेस वरिष्ठ नेता रामचन्द्र पौडेलले संसदीय प्रक्रिया अगाडि बढेपछि त्यसै अनुसार आफ्नो पार्टीले निर्णय लिने बताए । संसदीय प्रक्रिया अगाडि नबढी कांग्रेसको भूमिका नहुने भएकाले संसदीय प्रक्रिया सुरु भएपछि समीकरणकाबारेमा निर्णय लिने बताए । पौडेलले सर्वोच्च अदालतले प्रतिनिधिसभा पुनःस्थापना गरी संविधान, लोकतान्त्रिक प्रणाली र संसदीय प्रणालीलाई बचाएकोमा धन्यवाद दिए ।
बुधबार नेकपाको प्रचण्ड नेपाल समूहका अध्यक्षद्वय पुष्पकमल दाहाल प्रचण्ड र माधवकुमार नेपालले कांग्रेस सभापति देउवालाई भेट गरी सत्ता सहकार्यका लागि आग्रह गरेका थिए । तर देउवाले पार्टी बैठक बसेर यसबारे निर्णय लिने बताएका थिए । \
