अमेरिकाले ग्रिनल्यान्डलाई ‘चीनमा निर्भर हुन दिनेछैन’
ब्रसेल्स । अमेरिकी विदेशमन्त्री मार्को रुबियोले शुक्रबार वासिङ्टनले ग्रिनल्यान्डवासीहरूको आत्मनिर्णयलाई सम्मान गरेको तर स्रोत–सम्पन्न स्वायत्त यस डेनिस क्षेत्रलाई चीनमा निर्भर हुन नदिने बताएका छन् ।
अमेरिकी राष्ट्रपति डोनाल्ड ट्रम्पले सुरक्षा कारणहरूका लागि आर्कटिक द्वीप कब्जा गर्न चाहेको बारम्बार बताउँदै आएका छन् । यसले अमेरिकाको दीर्घकालीन मित्र र नाटो सदस्य डेनमार्कलाई क्रोधित बनाएको छ ।
“ग्रिनल्यान्डवासीहरू डेनमार्कको हिस्सा हुन चाहँदैनन् भन्ने कुरामा डेनमार्कले ध्यान केन्द्रित गर्नुपर्छ”, ब्रसेल्समा नाटोका विदेशमन्त्रीहरूसँगको बैठकपछि रुबियोले भने, “हामी अब चीनलाई भित्र आउन दिन, उनीहरूलाई धेरै पैसा दिन प्रस्ताव गर्न र चीनमा निर्भर बन्न भन्न गइरहेका छैनौँ ।”
ग्रिनल्यान्डको ५७ हजार जनसङ्ख्याको विशाल बहुमत डेनमार्कबाट स्वतन्त्र हुन चाहन्छ तर संयुक्त राज्यको हिस्सा बन्न चाहँदैन भन्ने जनमत सर्वेक्षणले देखाएको छ ।
गत हप्ता टापुको भ्रमणका क्रममा अमेरिकी उपराष्ट्रपति जेडी भान्सले वासिङ्टनले ‘ग्रिनल्यान्डवासीहरूको आत्मनिर्णयलाई सम्मान गर्ने’ कुरा स्पष्ट पार्नुभएको रुबियोले बताए । नुक र कोपेनहेगन दुवैले यस भ्रमणलाई उक्साहटको रूपमा हेरेका थिए ।
रुबियोले नाटो वार्ताको साइडलाइनमा भएको बैठकपछि, दुई देशबीचको ‘बलियो’ सम्बन्धबारे आफ्ना डेनिश समकक्षीलाई आश्वासन दिएका थिए ।
