गाजास्थित प्रमुख स्वास्थ्य केन्द्र अल–शिफा अस्पतालको अवस्था दयनीय
विश्व स्वास्थ्य सङ्गठन, (डब्ल्यूएचओ)ले गाजास्थित प्रमुख स्वास्थ्य केन्द्र अल–शिफा अस्पतालको अवस्था दयनीय र जोखिमपूर्ण बनेको चेतावनी दिएको छ ।
उक्त अस्पताल अहिले लगभग बिजुली नभएको र खानेकुरा तथा पानीको अभावको अवस्थाबाट गुज्रिरहेको छ । पहिल्यैदेखिको गम्भीर अवस्थालाई अस्पताल क्षेत्र आसपास निरन्तर भइरहेका गोलाबारी र बमबारीले झन् बिगारेको र अल–शिफाले अस्पतालको रूपमा काम गर्न छोडेको डब्ल्यूएचओका प्रमुख टेड्रोस एड्हानोम गेहब्रेयससले बताएका छन् ।
त्यहाँ उपचाररत जोखिममा रहेका नवजात शिशुहरूलाई उक्त अस्पतालबाट अर्को अस्पतालमा सार्ने काममा सघाउन तयार रहेको इजरायली सेनाले बताएको छ ।
महिना नपुगी जन्मेका प्रत्येक तीनमध्ये एक शिशुको बिजुली अभावका कारण ज्यान जाने गरेको अल–शिफा अस्पतालका शल्यक्रिया प्रमुख मारवान अबु सादाले बताए । यसअघि इन्क्यूबेटरमा राखिएका नवजात शिशुहरूलाई बिजुली अभावका कारण शल्यचिकित्सा वार्डका शय्याहरूमा सारिएको छ ।
थुप्रै नवजात शिशुहरूले पाउनुपर्ने सेवा नपाइरहेको भन्दै उनले ती सबैको ज्यान जान सक्ने डर भएको बताए। गाजाको हमासद्वारा सञ्चालित स्वास्थ्य मन्त्रालयले अल–शिफा अस्पतालको पछिल्लो अवस्थाबारे जानकारी गराउँदै अस्पतालभित्र अझै कम्तीमा २ हजार ३ सयजना रहेका जनाएको छ ।
