१६ वर्ष जेलमा बसेर दोषमुक्त भएका मानिससँग अमेरिकी लेखिकाले मागिन् माफी



अमेरिकी लेखिका एलिस सेबोल्डले आफूलाई सन् १९८१ मा बलात्कार गरेको आरोपमा गलत तरिकाले दोषी ठहर गरिएका मानिससँग माफी मागेकी छन् । त्यसरी गलत रूपबाट दोषी ठहर भएर १६ वर्ष जेल सजाय बिताएका एन्थोनी ब्रोडवाटरलाई गत सातामात्रै दोषमुक्त गरिएको थियो । एलिसले आफ्नो संस्मरणात्मक पुस्तक ’लक्की’मा आफूमाथि बलात्कार भएको घटना उल्लेख गरेकी छन् ।

उनले पुस्तकमा बलात्कारपछि गल्लीमा एकजना अश्वेत मानिस देखेको र आफूमाथि हमला गर्ने व्यक्ति तिनै भएको ठानेको बताएकी छन् । त्यसपछि एन्थोनी ब्रोडवाटरलाई पक्राउ गरिएको थियो र उनलाई दोषी पाइएको भनेर जेलमा हालिएको थियो ।

आफ्ना वकिलहरूमार्फत एउटा विज्ञप्ति जारी गर्दै ब्रोडवाटरले भनेका छन् ‘उनले माफी मागेकोमा राहत’ मिलेको छ । सेबोल्डले माफी माग्दै विज्ञप्तिमा भनेकी छन्, ‘तपाईँले जस्तो खालको जीवन जिउन सक्नु हुन्थ्यो त्यो तपाईँबाट अन्यायपूर्ण रूपमा छिनिएकोमा म माफी माग्छु, र मलाई थाहा छ तपाईँमाथि जे भयो त्यो कुनै पनि माफीले कहिल्यै परिवर्तन गर्नसक्दैन।’

उनको पुस्तकमा आफू १८ वर्ष हुँदा न्यूयोर्कस्थित सिराक्युज विश्वविद्यालयमा पढ्दा उनीमाथि कसरी हमला भएको थियो भन्ने विस्तृतमा लेखेकी छन् । महिनौँपछि, उनले प्रहरीलाई त्यसबारे जानकारी दिएकी थिइन् ।

उनले आफूलाई जसले हमला गरेको ठानेको त्यो व्यक्तिलाई गल्लीमा देखेकोबारे प्रहरीलाई सचेत गराएकी थिइन् । त्यसपछि उक्त क्षेत्रमा त्यतिबेला अधिकृत रहेका प्रहरीले ब्रोडवाटरलाई गिरफ्तार गरेका थिए ।

ब्रोडवाटरमाथि त्यसपछि सुनुवाइ भयो र सेबोल्डले दिएको बयान र कपालको सूक्ष्म विश्लेषणका आधारमा दोषी ठहर गरिएको थियो । सन् १९९८ मा जेलबाट बाहिरिए पनि उनको नाम यौन अपराधीका रुपमा दर्ता भएर रहिरह्यो ।

उक्त मुद्दामाथि पुनः परीक्षण गरिँदा उनी नोभेम्बर २२ मा दोषमुक्त ठहर गरिएका हुन् । यसअघि अपर्याप्त प्रमाणका आधारमा दोषी ठहर गरिएको भन्दै अहिले आएर उनलाई दोषमुक्त गरिएको हो । सेबोल्टले आफ्नो विज्ञप्तिमा आफूले विगत आठ दिनमा कसरी यो सबै हुनसक्यो भनेर बुझ्ने प्रयास गरिरहेको बताइन् ।

‘मलाई बलात्कार गर्ने मानिस को हो भनेर कहिल्यै थाहा हुने छैन भन्ने तथ्यले पनि मलाई सताइरहनेछ। त्यो व्यक्तिले अन्य महिलालाई पनि बलात्कार गरेको हुनसक्छ र ब्रोडवाटरले भोगेजस्तो उसले कहिल्यै जेलसजाय भोग्नुपर्नेछैन,’ उनले विज्ञप्तिमा लेखेकी छन् ।

उनको संस्मरणात्मक पुस्तक ’लक्की’ १० लाखभन्दा बढी प्रति बिकेको छ र उनलाई लेखकका रूपमा यही पुस्तकले चिनाएको कतिपय पत्रिकाले लेखेका छन्।

 

यो खबर पढेर तपाईलाई कस्तो महसुस भयो ?

प्रतिक्रिया दिनुहोस
चीन भ्रमण गर्ने योजनामा पुटिन

  रुसी राष्ट्रपति भ्लादिमिर पुटिनले आगमी मे महिनामा चीन भ्रमण गर्ने योजना बनाउनुभएको

लाओसमा दादुरा र रुबेलाबाट बालबालिकालाई जोगाउन खोप अभियान सुरु

लाओसको स्वास्थ्य मन्त्रालयले बालबालिकाको स्वास्थ्य रक्षाका लागि राष्ट्रव्यापी दादुरा र रुबेला खोप अभियान

चीन र अमेरिका प्रतिद्वन्द्वी नभई साझेदार हुनुपर्छः राष्ट्रपति सी

  चीनका राष्ट्रपति सी जिनपिङले अमेरिकी विदेशमन्त्री एन्टोनी ब्लिङ्केनसँग विश्वका दुई सबैभन्दा ठूला

चिनियाँ वैज्ञानिकद्वारा सेलफोन चार्ज गर्न सक्ने पहिरनयोग्य ब्याट्री निर्माण

चिनियाँ वैज्ञानिकहरूको टोलीले ऊर्जा भण्डारण गर्न सक्ने तथा स्मार्टफोन र घडी जस्ता व्यक्तिगत