सुडानमा ‘सैन्य कू’ गर्ने असफल प्रयास
सुडानमा अपदस्थ भूतपूर्व राष्ट्रपति ओमर अल–बशिरका समर्थकहरूले कू अर्थात् सैन्य विद्रोह मार्फत सत्तापलट गर्न गरेको एउटा प्रयास असफल तुल्याइएको सरकारले जनाएको छ ।
‘कू गर्ने एउटा असफल प्रयास गरिएको छ र जनताले त्यसको प्रतिवाद गर्नुपर्छ,’ मंगलबार सरकारी टेलिभिजनले भनेको छ । यद्यपि कू गर्ने षड्यन्त्र कसले गरेका हुन् भन्नेबारे रिपोर्टमा खुलाइएको छैन ।
राजधानी खार्तुम र ओमडर्मान आसपास क्षेत्रबाट प्राप्त विवरणहरूअनुसार ती क्षेत्रमा बाक्लो सैन्य गतिविधि देखिएको छ र नाइल नदीमाथि रहेका पुलहरू बन्द गरिएका छन् ।
समाचार संस्था एएफपीका अनुसार केही मानिसहरूले सरकारी सञ्चारमाध्यमको भवन कब्जामा लिने प्रयास गरेका थिए । स्थिति नियन्त्रणमा लिन सरकारले आवश्यक कदमहरू चालेको पनि विवरणहरूमा जनाइएको छ ।
रोएटर्स समाचार संस्थाले सेनाका प्रवक्ता मोहम्मद अल फाकिलाई उद्धृत गर्दै संदीग्धहरूलाई छिटै नै सोधपुछ गरिने जनाएको छ ।
दुई वर्षअघि देशका लामो समयदेखिका शासक ओमार अल–बशिरलाई अपदस्थ गरिएको थियो । त्यसपछि सत्ता साझेदारी सम्झौता अन्तरगत सेना, गैरसैनिक प्रतिनिधि र विरोध प्रदर्शनकारी समूहहरूको संलग्नतामा अन्तरिम सरकार स्थापना गरिएको थियो।
