इटलीमा कर्मचारीहरूका लागि हरियो पास अनिवार्य
इटलीमा कर्मचारीहरूले खोप लगाएको, कोभिड परीक्षण गर्दा नतिजा नेगेटिभ आएको वा कोरोनाभाइरसबाट सङ्क्रमित भएर निको भएको प्रमाण अनिवार्य पेस गर्नुपर्ने व्यवस्था लागु गरिँदैछ । त्यहाँ सरकारले हरियो पासको व्यवस्था गर्ने छ ।
युरोपमा इटलीले पहिलोपटक यस्तो व्यवस्था सार्वजनिक गर्न लागेको हो । हरियो पास नहुने कर्मचारी निलम्बनमा पर्नसक्ने बताइएको छ । उनीहरूको पारिश्रमिक पाँच दिनसम्म रोक्न सकिने समेत बताइएको छ ।
अक्टोबर १५ तारिखबाट कार्यान्वयनमा आउने उक्त व्यवस्था कोभिडको व्यापक असर झेलेको इटलीमा खोप लगाउनेहरूको सङ्ख्या बढाउनका लागि गर्न लागिएको हो । डिजिटल माध्यमबाट र कार्डका रूपमा उपलब्ध गराइने हरियो पास रेल स्टेसन, सिनेमा हल, रेष्टुराँ, व्यायामशाला र पौडी पोखरीका लागि उपलब्ध गराउनुपर्ने व्यवस्था इटलीमा विद्यमान छ ।
विद्यालयका कर्मचारीहरूले पनि हरियो पास देखाउनुपर्ने हुन्छ । केही शिक्षकहरूलाई त्यस्तो गर्न नसकेका कारण कामबाट फर्कन भनिएको बताइएको छ । इटलीमा मध्य अक्टोबरदेखि झन्डै २ करोड ३० लाख मानिसहरूले त्यस्तो प्रमाणित गर्नुपर्नेछ । हालसम्म खोप नलगाएका ४० लाख कामदारहरूलाई प्रेरित गर्नका लागि त्यस्तो व्यवस्था सार्वजनिक गरिएको बताइएको छ ।
उक्त नियम अवज्ञा गर्नेहरूले १ हजार आठ सय अमेरिकी डलरसम्मको जरिवाना तिर्नुपर्ने व्यवस्था छ भने उनीहरूलाई निलम्बन समेत गर्न सकिने व्यवस्था छ ।
सर्वेक्षणहरूका अनुसार अधिकांशले पछिल्लो सरकारी कदमलाई समर्थन गरेका छन् । त्यहाँको सरकारले अनिवार्य खोपको व्यवस्थाबारे पनि सोच बनाइरहेको बताइएको छ।