दक्षिण कोरियामा सन् २०२० मा जन्मिने मानिसको सङ्ख्याभन्दा बढी मृत्यु

दक्षिण कोरियामा सन् २०२० मा पहिलो पटक मानिसको जन्मभन्दा बढी सङ्ख्यामा मृत्यु भएको पाइएपछि त्यसप्रति चिन्ता व्यक्ति गरिएको छ । दक्षिण कोरियामा शिशु जन्मदर विश्वकै न्यून छ । सन् २०२० मा त्यहाँ अघिल्लो वर्षको तुलनामा १० प्रतिशत कम अर्थात् २,७५,८०० शिशु जन्मिएका थिए । उक्त वर्ष ज्यान गुमाउने मानिसको सङ्ख्या ३,०७,७६४ रह्यो ।

जनसङ्ख्या घट्दा देशमाथि चर्को दबाव उत्पन्न हुन्छ । स्वास्थ्यसेवा र निवृत्तिभरणको मागका कारण सार्वजनिक खर्च जुटाउन आइपर्ने समस्याबाहेक घट्दो युवा जनसङ्ख्याले श्रमशक्तिको अभाव निम्त्याउँदै अर्थतन्त्रलाई प्रत्यक्ष रूपमा नै प्रभाव पार्छ । अघिल्लो महिना राष्ट्रपति मुन जे इनले प्रोत्साहनस्वरूप भत्ता दिनेसहित जन्मदर बढाउने उद्देश्यले कैयौँ नीतिहरू घोषणा गरेका थिए ।

उक्त योजनाअन्तर्गत सन् २०२२ बाट प्रत्येक शिशुलाई १,८५० अमेरिकी डलरजति (झन्डै २,१६,००० नेपाली रुपैयाँ ) नगद उपलब्ध गराइनेछ । त्यसबाहेक एक वर्ष नपुगुन्जेलसम्म मासिक ३२,००० रुपैयाँभन्दा बढी रकम शिशु स्याहार खर्च दिइनेछ ।

उक्त मासिक प्रोत्साहन भत्ता वृद्धि गरेर सन् २०२५ मा ५०,००० रुपैयाँभन्दा बढी बनाउने भनिएको छ । दक्षिण कोरियामा महिलाहरूले काम र व्यक्तिगत जीवनको सन्तुलन मिलाउन सङ्घर्ष गर्नुपरेकाले यसो भएको हो ।

ह्युन यू किम तिनै महिलामध्ये एक हुन्। परिवारका चार सन्तानमध्येकी जेठी उनले आफ्नो पनि ठूलो परिवार होओस् भन्ने सपना देखेकी थिइन् । तर उनले दक्षिण कोरियामा परिवारमैत्री वातावरण पाइनन् । त्यही भएर आफ्नो योजनामा पुनर्विचार गरिरहेको उनी बताउँछिन् । हालै नयाँ जागिर पाएकी उनलाई सन्तान जन्माउन बिदा लिन अप्ठेरो लागेको छ ।

घरजग्गाको बढ्दो मूल्य अर्को प्रमुख विषय हो । किम भन्छिन् तीव्र गतिले वृद्धि भइरहेको मूल्यले युवा जोडीहरूलाई सन्तान जन्माउन निरुत्साहित गरिरहेको छ । उनी सरकारले प्रस्ताव गरेको प्रोत्साहनप्रति पनि विश्वस्त छैनन् । “सन्तान हुर्काउन खर्चालु हुन्छ। सरकारले केही थप रकम दिएर हाम्रो समस्या समाधान हुँदैन।”