वेलायतमा दुई हप्तापछि लकडाउन खुल्ने
वेलायतमा कोरोनाभाइरस सङ्क्रमण बढेको पाइएपछि यो सप्ताहन्तदेखि खुकुलो पारिने भनिएका क्षेत्रहरूमा लकडाउन कम्तीमा अर्को दुई हप्ताका लागि कायम राख्ने निर्णय गरिएको छ । प्रधानमन्त्री बोरिस जोनसनले अहिले साइकलमा ब्रेक लगाउनुपर्ने बेला आएको बताएका छन् । क्यासिनो र बावलिङ खेलस्थलहरू बन्द रहनेछन् ।
सिनेमाहलजस्ता स्थानमा मास्क अनिवार्य हुनेछ । इङ्गल्यान्डका प्रमुख मेडिकल अफिसर प्राध्यापक क्रिश ह्वीटीले डाउनिङ स्ट्रीटमा प्रधानमन्त्रीसँगै उपस्थित भएरसबै क्षेत्र खुला गरेर पनि भाइरस नियन्त्रण हुन्छ भन्ने विचार गलत भएको बताए । प्रधानमन्त्रीले जोनसनले दैनिक र साप्ताहिक मृत्यु सङ्ख्या कम भएको औँल्याउँदै कोरोनाभाइरस नियन्त्रणमा भएको प्रगति निरन्तर रहने बताए ।
तर केही युरोपेली मुलुकहरू कोरोनाभाइरस नियन्त्रण गर्न सङ्घर्ष गरिरहेको भन्दै जोनसनले त्यस्तो अवस्था आएमा वेलायत तयार अवस्थामा रहनुपर्ने बताए । राष्ट्रिय तथ्याङ्क विभाग (ओएनस)ले शुक्रवार जारी गरेको तथ्याङ्क अनुसार एक हप्ता अगाडि प्रतिदिन ३,२०० जनामा सङ्क्रमण पुष्टि हुने गरेकोमा यो हप्ता प्रतिदिन करिब एक हजारले बढेर ४,२०० जति पुगेको छ ।
प्रधानमन्त्री जोनसनले मानिसहरूलाई नियम पालना गर्न, हात धुन मास्क लगाउन र भौतिक दूरि कायम राख्न र लक्षण देखा परेको भए परीक्षणमा जान आग्रह गरे ।
वेलायतमा अहिलेसम्म कोरोनाभाइरसका कारण ४६,११९ जनाले ज्यान गुमाइसकेका छन् । जोनसनले अगस्ट १ तारिखदेखि खोल्ने भनिएका क्षेत्रहरू कम्तीमा दुई हप्ता पछाडि सारिएको बताएका छन् । अर्को सप्ताहन्तदेखि सङ्ग्रहालय र प्रार्थना गर्ने ठाउँहरूमा समेत मास्क अनिवार्य बनाइने भएको छ । अहिले पसल, बैंक, विमानस्थल र भवनभित्र रहेका यातायात कार्यालयमा मास्क अनिवार्य रहेको छ ।
