न्यूजिल्याण्डको एक सुपरमार्केटमा अरू मानिससामु खोकेपछि अदालतको कठघरामा

न्यूजील्यान्डको क्राइस्टचर्च शहरस्थित एक सुपरमार्केटमा एकजना पुरुषले जानाजान अरू मानिस सामु खोकेको र त्यसको भिडियो खिचेको पाइएपछि उनीविरुद्ध ’अपमानजनक कार्य’ गरेको अभियोग लगाइएको छ । ३८ वर्षीय रेमन्ड कुम्ब्सले आफू मदिराको नशामा रहेको र ठट्टाको रूपमा त्यसो गरेको बताएका छन् ।

पछि ती पुरुषले आफ्नो कार्यबारे दुःख व्यक्त गरेका छन् । त्यसरी अरूको अगाडि गएर खोक्नु अनि त्यसको भिडियो बनाउने कार्य ’मूर्खतापूर्ण र असम्वेदनशील’ भएको भन्दै त्यसप्रति उनले दुःख व्यक्त गरेका छन् । सो भिडियो फेसबुकमा राखिएपछि भाइरल भएको थियो र त्यसले व्यापक आक्रोश उब्जाएको थियो । ती व्यक्तिविरुद्ध सुरुमा जनस्वास्थ्यसम्बन्धी आदेश उल्लंघन गरेको भन्दै फौजदारी अभियोग पनि लगाइएको थियो तर पछि त्यो अभियोग भने फिर्ता लिइयो ।

प्रधानमन्त्री जसिन्डा आर्डर्नले ती व्यक्तिलाई ’बेवकुफ’को संज्ञा दिइन् । कोरोनाभाइरसको सङ्क्रमण मानिसहरूले खोक्दा वा हाच्छ्युँ गर्दा निस्कने स साना पानीमिश्रित कणमार्फत् एकअर्कामा फैलने वैज्ञानिकहरूले चेतावनी दिँदै आएका छन् । त्यसै कारण सकेसम्म मुख छोप्नु पर्ने वा कम्तीमा एक मिटरको सामाजिक दूरी कायम गर्नु पर्ने बताइएको छ । यस्तो परिस्थितिमा अरूको अगाडि गएर जथाभावी र जानाजान खोक्नु वा हाच्छ्युँ गर्नुलाई धेरैले ठीक ठान्दैनन् ।

संसारभरि नै पछिल्ला साताहरूमा मानिसहरूको सार्वजनिक व्यवहार सम्वेदनशील भनिएको बेला न्यूजील्यान्डको घटना प्रकाशमा आएको छ । यसबीच विश्वभरिको कोभिड १९ को आँकडा राख्दै आएको जोन्स हप्किन्स विश्वविद्यालयका अनुसार न्यूजील्यान्डमा हालसम्म एक हजार एक सय मानिसमा कोरोनाभाइरस सङ्क्रमण पाइएको छ । त्यहाँ कोभिड १९ का कारण एकजनाको ज्यान गइसकेको छ । नजिकैको अस्ट्रेलियामा भने कोरोनाभाइरस सङ्क्रमितको सङ्ख्या साढे पाँच हजार पुगेको छ ।