पोखरामा भलिबल च्याम्पियनसिप हुने
काठमाडौं । लायन्स इन्टरनेशनल डिस्ट्रिक्ट ३२५ एम, नेपालको आयोजनामा ‘प्रथम लायन्स कप राष्ट्रिय तथा अन्तरराष्ट्रिय आमन्त्रित पुरुष भलिबल च्याम्पियनसिप–२०८२’ हुने भएको छ ।
लायन्सले आज काठमाडौँमा पत्रकार सम्मेलन गरी आगामी वैशाख १८ गतेदेखि २२ गतेसम्म पोखरामा भलिबल च्याम्पियनसिप हुने जानकारी गराएको हो ।
संस्थाको स्थापना अन्तरराष्ट्रियस्तरमा एक सय सात वर्ष र नेपालमा ५३ वर्ष पूरा भएको उपलक्ष्यमा नेपालको राष्ट्रिय खेल भलिबललाई प्रवर्द्धन गर्ने उद्देश्यले भलिबल च्याम्पियनसिप आयोजना गर्न लागिएको डिस्ट्रिक्ट गभर्नर चण्डीप्रसाद अर्यालले जानकारी दिए । उनले खेलहरू पोखरा रङ्गशालास्थित मल्टिपर्पोज हलमा हुने बताए ।
उनले लायन्सको माध्यमबाट राष्ट्रिय तथा अन्तरराष्ट्रियस्तरमा भलिबल खेलको प्रवर्द्धन गर्नु र युवा खेलाडीलाई अन्तरराष्ट्रिय खेलाडीसँग प्रतिस्पर्धा गर्ने अवसर प्रदान गर्नु च्याम्पियनसिपको प्रमुख उद्देश्य रहेको बताए ।
“लायन्सको माध्यमबाट राष्ट्रिय तथा अन्तरराष्ट्रियस्तरमा भलिबल खेलको प्रवर्द्धन गर्नु, युवा खेलाडीलाई अन्तरराष्ट्रिय खेलाडीसँग प्रतिस्पर्धा गर्ने अवसर प्रदान गर्नु, पोखरालाई खेल पर्यटनको केन्द्रका रूपमा स्थापित गर्ने र खेलकुदमार्फत अन्तरराष्ट्रिय सम्बन्ध विस्तार गर्ने उद्देश्य लिइएको छ”, उनले भने ।
च्याम्पियनसिपमा छ वटा टिमको सहभागिता रहने आयोजकले जनाएको छ । पाकिस्तान भलिबल क्लब इस्लामावाद, गण्डकी प्रदेश भलिबल सङ्घ, नेपाल पुलिस क्लब, नेपाल एपिएफ क्लब र त्रिभुवन आर्मी क्लबसँग सम्झौता भइसकेको तथा भारत र इरानको टिमसँग सरसल्लाह भइरहेको आयोजकले जनाएको छ ।
च्याम्पियनसिपको प्रथम पुरस्कार रु चार लाख ४४ हजार ४४४, द्वितीय पुरस्कार रु दुई लाख ४४ हजार ४४४ र तृतीय पुरस्कार रु एक लाख ४४ हजार ४४४ नगद, ट्रफी मेडल र प्रमाणपत्र राखिएको छ । च्याम्पियनसिपको सर्वोत्कृष्ट खेलाडीलाई रु १४ हजार ४४४ नगद, मेडल र प्रमाणपत्र प्रदान गरिनेछ भने विधागत पुरस्कारतर्फ रु आठ हजार ४४४ रहेको आयोजकले जनाएको छ ।
