नेपाललाई मलेसियाविरुद्धको टी–२० सिरिज
काठमाडौं । मलेसिया भ्रमणमा रहेको नेपाली महिला टोलीले टी–२० सिरिज आफ्नो पक्षमा पारेको छ । आइतबार अन्तिम टी–२० खेलमा मलेसियालाई तीन विकेटले पराजित गर्दै नेपालले सिरिज ३–२ जितेको हो ।मलेसियाले दिएको ११० रनको लक्ष्य १९.२ ओभरमा सात विकेट गुमाउँदै भेट्टाएको हो ।
नेपालले १९.२ ओभरमा सात विकेटको क्षतिमा ११४ रन बनाएको थियो । नेपालका लागि सीता राना मगरले सर्वाधिक ३४ रन बनाउँदा कप्तान रुबिना क्षेत्रीले २३ रनको योगदान गरिन् ।
त्यस्तै अप्सरी बेगम १५ तथा ज्योति पाण्डे १० रनमा अविजित रहँदा अन्य खेलाडीले दोहोरो अंकको रन बनाउन सकेनन् । मलेसियाका लागि एैना हाासिमले दुई तथा माहिरा इज्जाति, विनिफ्रेड दुराईसिंगम, अइसा इलिसा र नुर डानिया सुईहाडाले एक एक विकेट लिए । यसअघि टस जितेर पहिला ब्याटिङ गरेको मलेसियाले निर्धारित ओभरमा ५ विकेट गुमाएर १०९ रन बनायो ।
मलेसियाका वेन जुलियाले सर्वाधिक ४६ रन बनाइन् । यसैगरी वेनफर्ड डुरसिंगमले २४ रन बनाउँदा महिरा इज्जती इस्माइलले २० रनको योगदान गरेपछि मलेसियाले नेपाललाई चुनौतीपूर्ण लक्ष्य दिएको हो । नेपालका लागि कविता जोशीले २ विकेट लिँदा इश्वरी विष्टले एक विकेट हात पारिन् ।
