फ्रेन्ड्सलाई पराजित गर्दै मनाङ शीर्ष स्थानमा
काठमाडौं । शहीद स्मारक ए डिभिजन लिग फुटबलमा मनाङ मर्स्याङ्दी फुटबल क्लब तालिकाको शीर्ष स्थानमा उक्लिएको छ । च्यासल मैदानमा शुक्रबार भएको छैटौं चरणको अन्तिम खेलमा फ्रेन्ड्समाथि २–० गोल अन्तरको जित दर्ता गर्दै मनाङ शीर्ष स्थानमा उक्लिएको हो । मनाङले ६ खेलबाट १४ अंक बनाएको छ ।
जारी लिगमा मनाङ अपराजित रहेको छ । ६ मध्य मनाङले ४ खेलमा जित निकाल्दा २ खेल बराबरी खेलेको छ । मनाङलाई जिताउन विदेशी खेलाडी कोफी टिमोथी कोउडुले दुवै गोल गरेका हुन् । ३४ औं मिनेटमा कोफीले गोल गर्दै मनाङलाई सुरुवाती अग्रता दिलाएका थिए । पहिलो हाफमा १ गोल गरेको मनाङले दोस्रो हाफमा १ गोल थपेको थियो । पराजित भएको फ्रेन्ड्स भने ४ अंकका साथ तालिकाको १२ औं स्थानमा छ ।