नेपाल आईस हक्की संघ कास्कीको अध्यक्षमा पौडेल
पोखरा । नेपाल आईस हक्की संघका अध्यक्ष तथा वाग्मती प्रदेशका सभामुख भुवन पाठकले पर्यटकीय शहर पोखरामा आईस हक्कीको प्रचुर सम्भावना रहेको बताएका छन् ।
उनले विश्वका धेरै राष्ट्रहरुमा आईस हक्की लोकप्रिय खेलको रुपमा स्थापित भइसके पनि नेपालमा केहीवर्ष यता मात्र आईस हक्कीको प्रचार प्रसार विकास भइरहेको बताए ।
बिहीबार पोखरामा आयोजित नेपाल आईस हक्की संघ कास्की जिल्ला अधिवेशनलाई सम्बोधन गर्दै उनले पोखरामा छिट्टै आईस हक्कीको लागि स्टेडियम बनाउन पहलहरु भइरहेको बताए ।
अधिवेशनलाई सम्बोधन गर्दै संघका उपाध्यक्ष विजय खड्काले काठमाडौं र पोखरामा आईस हक्कीको लागि स्टेडियम बनाउने जग्गाको निरीक्षण र खोजी भइरहेको उल्लेख गर्दै केहीवर्षमै आईस हक्की नेपालमा लोकप्रिय खेल बन्नेमा आफू आशावादी रहेको बताए ।
अधिवेशनमा कास्की खेलकुद विकास समितिका उपाध्यक्ष विजय बहादुर भण्डारी, पर्यटन व्यवसायी अर्जुन खनाल लगायतले सम्बोधन गरेका थिए । संघको कास्की जिल्ला अधिवेशनले वीरेन्द्र पौडेलको अध्यक्षतामा ११ सदस्यीय नेपाल आईस हक्की कास्की जिल्ला कार्य समिति चयन गरेको छ ।
संघको उपाध्यक्षमा मिलन केसी., महिला उपाध्यक्षमा ईश्वरी चापागाईं, सचिवमा पूर्णबहादुर गुरुङ, कोषाध्यक्षमा सन्तोष घिमिरे र सदस्यहरुमा मनिष केसी., अमृत आचार्य, किरण गुरुङ र नसिव गुरुङ रहेका छन् ।