खोटाङका प्रमुख जिल्ला अधिकारीविरुद्ध भ्रष्टाचार मुद्दा दर्ता
काठमाडौं । खोटाङका प्रमुख जिल्ला अधिकारी भोजराज खतिवडाविरुद्ध भ्रष्टाचार मुद्दा दर्ता भएको छ । अख्तियार दुरुपयोग अनुसन्धान आयोगले सिद्धिचरण नगरपालिकाको प्रशासकीय अधिकृत हुँदा सिद्धिचरण नगरपालिका–१० मा विद्युत पोल तार र ट्रान्समिटर खरिद योजनामा भ्रष्टाचार गरेको अभियोगमा खतिवडाविरुद्ध आइतबार विशेष अदालतमा मुद्दा दर्ता गरेको हो ।
सिद्धिचरण नगरपालिकाका तत्कालीन प्रमुख प्रशासकीय अधिकृत खतिवडा(हाल खोटाङका प्रजिअ), नेपाल विद्युत प्राधिकरण, ओखलढुंगा वितरण केन्द्रका तत्कालीन कार्यालय प्रमुख सञ्जीव साह, सिद्धिचरण वडा नम्बर १० का तत्कालीन वडाध्यक्ष दामोदर धमला, तत्कालीन इन्जिनियर अमृत कुमार दाहाल र तत्कालीन खानेपानी तथा सरसफाइ प्राविधिक दिल कुमार बुढाथोकीविरुद्ध भ्रष्टाचार मुद्दा चलाइएको आयोगका प्रवक्ता भोला दाहालले जानकारी दिए ।