आफू प्रधानमन्त्रीको सल्लाहकार भन्दै ४५ लाख ठगी गरेको आरोपमा बाबुछोरा पक्राउ
काठमाडौं । प्रधानमन्त्रीको सल्लाहकार हुँ भन्दै ४५ लाख रूपैयाँ भन्दाबढी रकम ठगी गरेको आरोपमा बाबुछोरा पक्राउ परेका छन् । पक्राउ पर्नेमा काठमाडौंको नागार्जुन नगरपालिका–८ का ४४ वर्षीय राजेन्द्रप्रसाद खनाल र उनका छोरा २३ वर्षीय विशाल खनाल छन् ।
ठगीपछि फरार उनीहरूलाई काठमाडौं उपत्यका अपराध अनुसन्धान कार्यालयबाट खटिएको प्रहरी टोलीले आइतबार दिउँसो काठमाडौंको कोटेश्वरबाट पक्राउ गरेको कार्यालयका प्रवक्ता प्रहरी उपरीक्षक (एसपी) रवीन्द्र रेग्मीले जानकारी दिएका छन् ।
रेग्मीका अनुसार उनीहरूले विभिन्न कम्पनीहरू तथा व्यवसायहरूमा सहभागी गराउने विश्वास दिलाएर विभिन्न कागजातहरूमा सही छाप गराई पीडितबाट उक्त रकम ठगी गरेको पाइएको छ ।
साथै पीडितको ना.४ च. ८६७० नम्बरको स्करपियो जीपसमेत लिएर उनीहरू फरार भएका थिए । उनीहरूविरूद्ध इलाका प्रहरी कार्यालय, दमक, झापामा ठगीसम्बन्धी कसुरमा मुद्दा दर्ता भएको थियो ।
मुद्दा दर्तापछि जिल्ला अदालत, भद्रपुर, झापाबाट पक्राउ पुर्जी जारी भएको थियो । पक्राउ परेका दुवै जनालाई थप अनुसन्धान तथा आवश्यक कारबाहीका लागि इलाका प्रहरी कार्यालय, दमक पठाइएको प्रहरीले जनाएको छ ।
