नक्कली मृत्यु दर्ता प्रमाणपत्र बनाई ७ करोडको जग्गा बिक्री गर्ने ५ जना पक्राउ
काठमाडौं । प्रहरीले नक्कली कागजपत्र बनाएर जग्गा किनबेच गरेको अभियोगमा पाँच जनालाई पक्राउ गरेको छ । कीर्तिपुरमा रहेको करिब ७ करोड मूल्य पर्ने जग्गा नक्कली कागज बनाएर बिक्री गरेको अभियोगमा प्रहरीले महावीर चन्द, गणेश बहादुर खनाल, बाबुराम कार्की, प्रेम प्रसाद खनाल र डासी माया श्रेष्ठलाई पक्राउ गरेको हो ।
पक्राउ परेकाहरुले शान्तादेवीको नक्कली मृत्युदर्ता प्रमाण पत्र बनाएर भक्तपुरको सुनिता कर्माचार्यलाई जग्गा बिक्री गरेका थिए । २०५५ सालदेखि शान्तादेवी लोहनीको सपरिवार जापानमा बस्दै आएको थियो ।
२४ वर्षपछि नेपाल फर्किएकी शान्तादेवीले आफ्नो जग्गा बेचिएको थाहा पाएपछि प्रहरीमा उजुरी दिएका थिइन् । पक्राउ पर्ने मध्ये गणेशबहादुर खनाल यो गिरोहको मुख्य योजनाकार रहेको प्रहरीले जनाएको छ । पक्राउ परेका व्यक्तिहरुसँग नक्कली नागरिकताको प्रमाणपत्र, नक्कली जग्गाधनी प्रमाणपत्र लगायतका कागजपत्र बरामद भएको प्रहरीले जनाएको छ।
