ट्याक्सी प्रयोग गरी सहकारी चोरी गर्ने समूहका ६ जना पक्राउ
काठमाडौं । रातिको समयमा ट्याक्सी प्रयोग गरेर विभिन्न सहकारी र कारखानामा चोरी गर्ने समूहका ६ जनालाई प्रहरीले पक्राउ गरेको छ । महानगरीय अपराध महाशाखाको टोलीले पुस १२ गते साँझ काठमाडौं महानगरपालिका–१२ बुद्धनगरबाट चोरी गरेका सामान र ती सामान खरीद गर्ने कवाडी पसल सञ्चालकलाई पक्राउ गरेको हो ।
पक्राउ पर्नेमा सिन्धुपाल्चोक घर भई टोखा बस्ने ३१ वर्षीय रोशन उप्रेती, सर्लाही घर भई टोखा बस्ने ३३ वर्षीय रामपुनित महतो र २६ वर्षका रामविश्वास महतो, नुवाकोट घर भई गोंगबु बस्ने ३६ वर्षीय राम बाघदास र भारत मोतिहारी घर भइ हाल टेकुमा कवाडी पसल सञ्चालन गर्दै आइरहेका ५३ वर्षीय सत्रुधन प्रसाद जैसवाल रहेका छन् ।
उनीहरुको साथबाट प्रहरीले ९.५ किलोग्राम पित्तलको तारका क्वाइलहरु बरामद गरेको छ । चोरीका सामानसहित पक्राउ परेका उनीहरुमाथि थप कारबाहीको लागि महानगरीय प्रहरी वृत्त, थानकोट पठाइएको महानगरीय प्रहरी अपराध महाशाखाले जनाएको छ ।
अपराध महाशाखाका अनुसार उनीहरुले चन्द्रागिरी नगरपालिका–३ थानकोटस्थित बिशाल प्लाष्टोक्याब ई. प्रालिको कारखानाबाट करिब १८ लाख ७६ हजार ४ सय रुपैयाँ बराबरको पाइप बनाउन प्रयोग हुने तामा र पित्तलबाट बनेको कल साइजर चोरेको अनुसन्धानबाट खुलेको छ ।
