सरकारद्वारा नन्कुन्नी–निर्मला घटना छानबिन गर्न ६ सदस्यीय समिति गठन
काठमाडौं । सरकारसँग सहमति भएसँगै नेपालगञ्जकी महिला अधिकारकर्मी रुबी खानले आमरण अनसन तोडेकी छन् । गृह मन्त्रालयका सहसचिव हिरालाल रेग्मीको नेतृत्वमा ६ सदस्यीय समिति बनाउने सहमतिसँगै रुबीले करिव दुई साता लामो अनसन तोडेकी हुन् ।
मंगलबार अधिकारकर्मी मोहना अन्सारी र गृह मन्त्रालयका प्रवक्ता फणिन्द्रमणि पोखरेलले खानलाई जुस खुवाएर अनसन तोडाएका हुन् । बाँकेकी नन्कुन्नी धोबीको मृत्यु र निर्मला कुर्मी बेपत्ता सम्बन्धमा सरकारले छानबिन समिति गठन गरेपछि उनी अनसन तोड्न सहमत भएकी हुन् । छानबिन समितिलाई ७ दिनको म्याद दिएर प्रतिवेदन बुझाउन निर्देशन दिइएको छ ।
अनसन तोडेपछि रुबीले सरकारसँग भएको सहमतिले सम्पूर्ण महिलाहरुको जित भएको बताइन् । निर्मला कुर्मीको अपहरण, शरीर बन्धक र हत्या तथा नकुन्नी धोबीको हत्या भएको भन्दै मुस्लिम समाज चेतना केन्द्रले जिल्ला प्रहरी कार्यालय, बाँकेमा जाहेरी दिएको थियो । त्यसबारे प्रहरीले प्रभावकारी अनुसन्धान नगरेको भन्दै रुबी नेतृत्वको टोली नेपालगञ्जबाट २० दिन हिँडेर काठमाडौं आएको थियो ।
काठमाडौंमा आएर धर्ना शुरु गरे लगतै प्रहरीले रुबीलाई पुनः नेपालगञ्ज पुर्याएको थियो । प्रहरीले उनलाई अदालतबाट टुंगो लागिसकेको बहुबिवाहको मुद्दामा समेत फसाउन खोजेको थियो । तर सर्वोच्च अदालतले तत्काल रिहा गर्न आदेश दिएपछि रुबीलाई छाड्न प्रहरी बाध्य भएको थियो ।
