काठमाडौंका ‘रेडबुल’ स्टोरमा छापामारी प्रहरीद्वारा चार जना पक्राउ
काठमाडौँ । प्रहरीले काठमाडौँका पाँच स्थानमा रहेका शक्तिवर्द्धक पेय पदार्थ ‘रेडबुल’ स्टोरमा छापा मारेको छ । महानगरीय अपराध महाशाखाको टोलीले न्युरोड, सिनामंगल, पुरानो बानेश्वर, कपन र गोठाटारमा रहेको स्टोरमा छापा मारी चारजना स्टोर सञ्चालकलाई नियन्त्रणमा लिएको छ ।
पक्राउ पर्नेमा काठमाडौँका रबिनराज श्रेष्ठ, बाँकेका राजु पौडेल, ओेखलढुंगाका धनबहादुर श्रेष्ठ र सर्लाहीका वीरेन्द्र चौधरी छन् । स्टोरबाट ४ हजार ८ सय ४८ वटा रेडबुल बरामद गरिएको महानगरीय अपराध महाशाखाले जनाएको छ । महाशाखाका अनुसार २०७६ असार दुईमा प्रकाशित राजपत्र भाग–५ मा क्याफिनयुक्त शक्तिवर्द्धक पेय पदार्थ विक्री, वितरण बन्देज गरिएको छ ।
देशभर सर्वसुलभ रूपमा पाइने रेडबुल प्रतिबन्धित भएको हुनाले बेच्न नमिल्ने महाशाखाले जनाएको छ । उनीहरुले भारतबाट त्यस्ता पेय पदार्थ ल्याएर बेच्ने गरेको प्रहरी अनुसन्धानबाट खुलेको छ । पक्राउ गरिएकाहरूलाई थप अनुसन्धान र कारबाहीका लागी वाणिज्य आपूर्ति तथा उपभोक्ता संरक्षण विभागमा पठाइने महाशाखाले जनाएको छ ।
