थुनामा रहेका व्यक्ति छुटाइदिन्छु भन्दै ४२ लाख रुपैयाँ लिने वकिल पक्राउ
काठमाडौँ । प्रहरीले राजस्व चुहावट मुद्दामा थुनामा रहेका व्यक्तिलाई छुटाइदिन्छु भन्दै ४२ लाख घूस लिने अधिवक्ता टंकबहादुर राना मगरलाई पक्राउ गरेको छ । महानगरीय अपराध महाशाखाका प्रमुख एसएसपी सहकुल थापाले जनन्यायिक कानुनी सेवा केन्द्र माइतीघरका अधिवक्ता राना मगरलाई शुक्रबार पक्राउ गरिएको जानकारी दिएका छन् ।
राजस्व चुहावट प्रकरणमा नख्खु कारागारमा रहेका रमेश दाहाललाई भनसुनमा छुटाइदिन्छु भन्दै ४२ लाख घूस लिएको परिवारको निवेदनका आधारमा उनलाई पक्राउ गरिएको प्रहरीले जनाएको छ । थुनामा रहेका दाहाललाई अदालतले २ करोड, २५ लाख धरौटी माग गरेको छ । दाहाल २०७५ मंसिर २७ गतेबाट थुनामा छन् ।