प्रचण्डको तस्बिर जलाएको आरोपमा राप्रपाका नेता पक्राउ
हेटौंडा । नेकपा माओवादी केन्द्रका अध्यक्ष पुष्पकमल दाहाल प्रचण्डको तस्बिर जलाउने राष्ट्रिय प्रजातान्त्रिक युवा संगठनका नेता निराजन बम पक्राउ परेका छन् ।
बमले शनिबार हेटौंडामा राष्ट्रिय प्रजातन्त्र पार्टी (राप्रपा) निकट राष्ट्रिय प्रजातान्त्रिक युवा संगठन मकवानपुरको जिल्ला अधिवेशनमा सम्बोधनको क्रममा प्रचण्डको तस्बिर जलाएका थिए । बमलाई चितवनबाट पक्राउ गरि मकवानपुर ल्याउने तयारी भइरहेको मकवानपुरका प्रहरी प्रमुख प्रहरी उपरीक्षक विश्वराज खड्काले जानकारी दिएका छन् ।
बमलाई भरतपुर विमानस्थलबाट प्रहरीले नियन्त्रणमा लिएको हो । शुक्रबार मेलम्चीमा आयोजित कार्यक्रममा माओवादी अध्यक्ष प्रचण्डले पूर्वराजा ज्ञानेन्द्र शाहलाई भाइमारा, मूर्तिचोर जस्ता आरोप लगाएपछि राप्रपा आक्रोशित बनेको छ । त्यही आक्रोशस्वरुप बलमे प्रचण्डको तस्बिर जलाएका थिए ।
