सहकर्मीसँग फेसबुकबाट ‘नमरी बाँचे, कालले साँचे…’, भन्दै बिदा भए हितेन्द्रदेव
काठमाडौं । नेपाल विद्युत् प्राधिकरणका तत्कालीन कार्यकारी निर्देशक हितेन्द्रदेव शाक्य सेवा अवधि सकिएर बिदा भएका छन् ।
आफ्नो कार्यकाल बाँकी हुँदै कार्यकारी निर्देशकमा कुलमान घिसिङलाई नियुक्त गरिएपछि न्याय माग्दै शाक्य सर्वोच्च अदालत पुगेका थिए । तीन वर्षमा उनले ३१ पटक सर्वाेच्च अदालतमा तारिख धाएपनि कुनै निर्णय हुन नसकी सोमबार उनी बिदा भएका हुन् ।
कार्यकाल छँदै न्याय नपाएपछि सोमबार उनले सामाजिक संजालमार्फत सहकर्मीसँग बिदा लिएका छन् । उनले भनेका छन्, ‘धन्यवाद, बाइ बाइ, नमरी बाँचे कालले साँचे, फेरि भेट होला, तब सम्मलाइ बिट मारें है त, नेपाल विद्युत प्राधिकरण र सम्पूर्ण सहकर्मी साथीहरू । जय होस् ।।।।’
उनलाई तत्कालीन केपी शर्मा ओली नेतृत्वको सरकारले २७ माघ २०७७ मा चार वर्षका लागि प्राधिकरणको कार्यकारी निर्देशक नियुक्त गरेको थियो । तर शेरबहादुर देउवा नेतृत्वको सरकार आएपछि शाक्यलाई हटाउँदै कुलमान घिसिङलाई कार्यकारी निर्देशक नियुक्त गरिएको थियो ।
