उमागौरी कृषि सहकारीका अध्यक्ष रौनियारलाई पुर्पक्षका लागि थुनामा पठाउने आदेश
विराटनगर । जिल्ला अदालत मोरङले उमागौरी कृषि सहकारी संस्थाका अध्यक्ष शम्भुप्रसाद रौनियारलाई पुर्पक्षका लागि थुनामा पठाउने आदेश दिएको छ ।
आइतबार न्यायाधीश अरुणकुमार झाको इजलासले रौनियारलाई पुर्पक्षका लागि थुनामा पठाउने आदेश दिएको हो । आदेशलगत्तै रौनियारलाई कारागार चलान गरिएको छ ।
उक्त सहकारीको ठगी मुद्दामा संसदको सार्वजनिक लेखा समिति सभापति ऋषिकेश पोखरेलकी पत्नी अन्जला कोइराला पनि अभियुक्त हुन् ।
उनी भने यसअघि नै घरौटीमा रिहा भएकी छन् । उक्त सहकारीबाट २२ करोड ४८ लाख २७ हजार ७ सय रुपैयाँ अपचलन भएको प्रहरी दाबी छ । रौनियार र पोखरेलसहित २६ जनालाई प्रतिबादी बनाएर मुद्दा दर्ता भएको छ । मुद्दा दायर भएका मध्ये २१ जना अझै फरार छन् ।
