सशस्त्रका चार डीआईजीको पदावधि एक वर्ष थप गर्ने मन्त्रिपरिषदको निर्णय
काठमाडौं । सरकारले सशस्त्र प्रहरी बलका चार नायब महानिरीक्षक (डीआईजी) को म्याद एक वर्ष थप गर्ने निर्णय गरेको छ ।
प्रधानमन्त्री निवास बालुवाटारमा मंगलवार साँझ बसेको मन्त्रिपरषद बैठकले सशस्त्र प्रहरी बलका चार डीआइजीको म्याद एक वर्ष थप गर्ने निर्णय गरेको हो ।
यसरी म्याद थप हुने डीआईजीहरुमा शम्भु सुवेदी, कमल गिरी, गणेश ठाडा मगर र कुलबहादुर नेम्वाङ छन् । सशस्त्र प्रहरी बल नियमावलीमा डीआईजी दर्जामा बढुवा भएका भएका अधिकृतको चार वर्षे कार्यकाल पूरा भएपछि एक वर्षको थप अवधि पाउने सुविधा रहेको छ ।
सोही व्यवस्थाअनुसार मन्त्रिपरिषद बैठकले यस्तो सुविधा उपभोगको अवसर दिएको हो । सशस्त्र मुख्यालयको सिफारिसअनुसार गृह मन्त्रालयले दुई साता अघि नै डीआईजीहरुको एक वर्ष समय थप गर्ने प्रस्ताव मन्त्रिपरिषदमा दर्ता गरेको थियो ।
