रवि लामिछानेलाई पक्राउ गर्न माग गर्दै पोखरामा सहकारी पीडितको प्रदर्शन(भिडियोसहित)
पोखरा । राष्ट्रिय स्वतन्त्र पार्टीका सभापति रवि लामिछानेको पक्ष र विपक्षमा सोमबार बिहानैदेखि पोखरामा प्रदर्शन भइरहेको छ ।
जिल्ला प्रशासन कार्यालय कास्कीअगाडि सहकारीका पीडित बचतकर्ता र रास्वपाका नेता कार्यकर्ताले नाराबाजीसहित प्रदर्शनमा उत्रिएका हुन् । सहकारीपीडितले लामिछानेले सहकारीको रकम अपचलन गरेको भन्दै कारबाही माग गरेका छन् भने रास्वपाका कार्यकर्ताले उनको बचाउ गर्दै नाराबाजीमा उत्रिएका हुन् ।
दुई पक्ष प्रदर्शनमा उत्रिएपछि त्यसक्षेत्रमा ठूलो संख्यामा प्रहरी परिचालन गरिएको छ । सहकारी ठगी प्रकरणमा पूर्वडीआईजी एवं लामिछानेको पूर्वसाझेदार छविलाल जोशी आइतबार पक्राउ परेपछि रवि पनि प्रहरी निगरानीमा परेका छन् ।
प्रहरीले पक्राउ गर्न लागेको खबरले रवि आइतबार मध्यरातसम्म पार्टी कार्यालयमा बसेका थिए भने ठूलो संख्यामा रास्वपाका नेता कार्यकर्ता पनि पार्टी कार्यालयमा भेला भएका थिए । रविलार्ई पक्राउ गर्न प्रहरीले अदालतबाट पक्राउ पुर्जीसमेत लिइसकेको बताइएको छ ।
पार्टी सभापति पक्राउ पर्ने खबर सार्वजनिक भएपछि रास्वपाका उपसभापति डा. स्वर्णिम वाग्लेसहितको टोली चीन भ्रमण छोट्याएर आज स्वदेश फर्किँदैछ।
