गाग्रीमा पानी ओसार्ने समस्या समाधान हुन्छः खानेपानीमन्त्री राई
काठमाडौँ । खानेपानी मन्त्री राजेन्द्रकुमार राईले खानेपानीको समस्या समाधानका लागि आगामी आर्थिक वर्षको बजेट कोशेढुङ्गा साबित हुने दाबी गरेका छन् ।
प्रतिनिधिसभाको आइतबारको बैठकमा विनियोजन विधेयक, २०८१ माथि उठेका प्रश्नको जवाफ दिने क्रममा उनको सो विषय उल्लेख गरेका छन् । “खानेपानीका लागि लाइनमा बस्न नपर्ने गरी समस्या समाधान गर्छौ, कम्मरमा गाग्री बोकेर पानी ल्याउनुपर्ने समस्या समाधान हुन्छ”, उनले भने ।
मेलम्ची खानेपानी आयोजनामा बाढीले पुर्याएको क्षतिपछि आयोजनालाई कसरी अगाडि बढाउने भनेर अध्ययन भएको र बाढीका कारण पुरिएको आयोजनाको ट्याङ्की सुरक्षित स्थानमा लैजानका लागि मन्त्रिपरिषद्बाट स्वीकृतीप्राप्त भइसकेको उनको भनाइ थियो । त्यसका लागि एसियाली विकास बैंकले करिब दुई अर्ब अनुदान सहयोग गर्ने पनि उनले बताए ।
आयोजनाको दोस्रो चरणअन्तर्गत लार्के र याङ्ग्री खोलाबाट दैनिक १७ करोड लिटर पानी काठमाडौँ पुर्याउने गरी योजना निर्माण भइरहेको उनले बताए । उनले याङ्ग्री र लार्के खोलामा बन्ने हेडवक्र्ससम्म पहुँचमार्ग निर्माण भइरहेको जानकारी दिए ।
आगामी आर्थिक वर्षको बजेटमा बिनियोजित खानेपानी मन्त्रालयको बजेट र वार्षिक विकास कार्यक्रमले सबै जिल्ला र निर्वाचन क्षेत्रका मागलाई सम्बोधन गरेको उनको भनाइ थियो ।
मधेस प्रदेशको खानेपानी समस्या समाधानका लागि अल्पकालीन, मध्यमकालीन र दीर्घकालिन योजना मन्त्रालयले निर्माण गरिरहेको मन्त्री राईले उल्लेख गरे ।
