वान एक्स बेट प्रकरणमा पक्राउ परेका कलाकारसहित ११ जनाविरुद्ध अदालतमा मुद्दा दर्ता
काठमाडौं । अनलाइन (वान एक्स बेट) मार्फत जुवा खेलाउने र त्यसको प्रचार गर्ने ११ जनाविरुद्ध जिल्ला अदालत काठमाडौंमा मुद्दा दर्ता भएको छ । जिल्ला सरकारी वकिलको कार्यालयले अदालतमा मुद्दा दर्ता गरेको हो ।
उनीहरूविरुद्ध ३ देखि ११ वर्षसम्म कैद सजाय माग गर्दै मुद्दा दर्ता गरिएको काठमाडौं जिल्ला सरकारी वकिल कार्यालयका प्रमुख सहन्यायाधिवक्ता अच्युतमणि नेउपानेले जानकारी दिएका छन् ।
यो प्रकरणका मुख्य योजनाकारका रुपमा रहेका कैलालीको लम्किचुहा नगरपालिका–१० घर भई हाल काठमाडौं महानगरपालिका ७ चावाहिल बस्ने २८ वर्षीय दिनेश खड्का, उनकी पत्नी अनिता धितालविरुद्ध मुद्दा दर्ता भएको छ ।
यस्तै वान एक्स बेटको प्रचार गर्ने तथा एजेन्ट भएर काम गर्ने रोल्पा नगरपालिका ६ घर भई हाल कीर्तिपुर बस्ने युट्युबर २४ वर्षीय जलन घर्तीमगर, उदयपुर घर भई हाल ललितपुरको महालक्ष्मीथान बस्ने युट्युबर २८ वर्षीय एलिश राई, मुगु घर भई हाल ललितपुरको टीकाथली बस्ने १९ वर्षीय गणेश देवकोटा त्यस्तै कलाकारहरू बेगम नेपाली, मरिचमान श्रेष्ठ(बल्छी धुर्बे), राजु पौडेल, रोशन खतिवडा, सरोज घिमिरे र कुशल पोखरेलविरुद्ध मुद्दा दर्ता गरिएको छ ।