वाढी, पहिरो प्रभावितहरुलाई तत्काल उद्दार र राहतको व्यवस्था गर्न गृहमन्त्रीलाई प्रधानमन्त्रीको निर्देशन
काठमाडौं । प्रधानमन्त्री शेरबहादुर देउवाले मुलुकका विभिन्न भागमा अविरल वर्षाका कारण गएको बाढी पहिरो र डुबान प्रभावितको उद्दार र राहतको व्यवस्था गर्न गृहमन्त्रीलाई निर्देशन दिएका छन् ।
मंगलबार बिहान गृहमन्त्री बालकृष्ण खाँणलाई प्रधानमन्त्री निवासमा बोलाएर प्रधानमन्त्री देउवाले बाढी पहिरो प्रभावितको तत्काल उद्दार र राहतको व्यवस्था गर्न निर्देशन दिएका हुन् ।
प्रधानमन्त्रीले सामाजिक संजालमार्फत भनेका छन्, ‘सदुदूरपश्चिम लगायत मुलुकका विभिन्न क्षेत्रमा अविरल वर्षाका कारण गएको वाढी, पहिरो र डुवानबाट प्रभावितहरुलाई तत्काल उद्दार र राहतको व्यवस्था गर्न गृहमन्त्रीलाई निर्देशन गरेको छु।’
अविरल वर्षापछि आएको बाढी पहिरोका कारण मुलुकका विभिन्न भागका ठूलो क्षति पुगेको छ । वर्षापछि महाकाली नदीमा आएको बाढीले कञ्चनपुरका सयौं घर डुबानमा परेका छन् भने मुलुकका विभिन्न भागमा काटेर सुकाएको धान खेतमै डुबानमा परेको छ । त्यस्तै कतै सडक अवरुद्ध भएका छन् भने कतै घर घत्किएर मानवीय क्षति समेत भएको छ ।
