नक्कली भ्याट बिल प्रयोग गरेको अभियोगमा तीन फर्ममाथि मुद्दा
काठमाडौं । राजश्व अनुसन्धान विभागले झुठ्ठा तथा नक्कली मूल्य अभिवृद्धि करविजक प्रयोग गरी ठगी गरेको अभियोगमा विभिन्न तीन फर्ममाथि २० करोड बराबरको बिगो दाबी गर्दै मुद्दा दर्ता गरेको छ ।
विभागका अनुसार उच्च अदालत पाटनमा दुई र उच्च अदालत जनकपुरको वीरगन्ज इजलासमा एक मुद्दा दायर गरिएको छ । विभागले सञ्चालक किशोर चौधरीविरुद्ध दुई करोड १४ लाख ३० हजार २३८ रुपैयाँ बिगो दाबी गर्दै मुद्दा दायर गरेको छ । त्यस्तै धनुषाको जनकपुर उपमहानगरपालिका स्थायी घर भएका शिवम प्याकेजिङका सञ्चालक सीतादेवी जयसवालविरुद्ध पाँच करोड ८८ लाख ६५ हजार ९१९ र कागेश्वरी मनोहरा नगरपालिका–९ काँडाघारीको जय श्री गौतम सप्लायर्सका सञ्चालक मुकेश चौधरीविरुद्ध पाँच करोड ३२ लाख १६ हजार १८८ मुद्दा दायर गरिएको छ ।
उनीहरु विरुद्ध १३ करोड ३५ लाख १२ हजार ३४५ बिगो असुली गर्न माग गरिएको छ । यस्तै शिवम टेडर्स एण्ड सप्लायर्सका सञ्चालक जगदिश सहनीविरुद्ध चार करोड ७९ लाख ६९ हजार ४४७ बराबरको बिगो दाबी गरिएको छ ।
अनुस्का मल्टिप्रपोज कम्पनीका सञ्चालक शिवलाल तिम्लसिनाविरुद्ध एक करारेड ८२ लाख ५३ हजार ४६१ बराबरको बिगो दाबी गर्दै मुद्दा दायर गरिएको विभागले जनाएको छ ।
