उखु किसान उखु बोकेर आन्दोलनमा
काठमाडौं । लामो समयसम्म आफूहरुले पाउनुपर्ने बक्यौता रकम नपाएको भन्दै उखु किसानहरुले निरन्तर काठमाडौंको माइतीघरमा धर्ना दिएका छन् । बुधबार उनीहरुले चिनी मिल सञ्चालकबाट बक्यौता रकम उठाइदिन सरकारको ध्यानाकर्षण गर्न भन्दै माइतीघरमा धर्ना दिएका हुन् । धर्नामा सहभागी भएका उनीहरुले आफूहरुको माग पुरा नभए सिंहदरबार घेर्ने चेतावनी पनि दिएका छन् ।
चिनी मिल सञ्चालकबाट बक्यौता रकम उठाइदिन सरकारले गरेको बाचा पुरा नभएको भन्दै सर्लाहीका उखु किसानले आइतबारलेखि काठमाडौं केन्द्रित आन्दोलन सुरु गरेका हुन् । उनीहरूले गत वर्षको पुस १६ गते सरकारसँग भएको ५ बुँदे सम्झौता कार्यान्वयन गर्न माग गरेका छन् । किसानहरुले काठमाडौंमा बसेको सरकारले आफूहरुको कुरा नसुनेको गुनासो गरेका छन् ।
सरकारले किसानसँग गरेको पटक पटकको बाचाअनुसार मंसिर २६ गतेसम्म किसानले बक्यैता प्राप्त गर्नपर्ने भएपनि एक वर्षको अवधिमा कुनै प्रगति नभएको उखु किसान संघर्ष समितिले जनाएको छ ।
