आरडिटी परीक्षण बन्द गर्ने सरकारको निर्णय
काठमाडौं । सरकारले आरडिटी परीक्षण बन्द गरेको छ । आइतबार आयोजित पत्रकार सम्मेलनमा स्वास्थ्य तथा जनसंख्या मन्त्रालयका प्रवक्ता डा. जागेश्वर गौतमले आरडिटी विधिबाट कोरोना परीक्षण नगर्न सबै प्रदेशका स्वास्थ्य संस्थालाई निर्देशन दिइसकेको जानकारी दिएका हुन् ।
आरडिटी परीक्षण नगर्न लामो समयदेखि सरकारलाई दवाव परेको थियो । त्यसपछि सरकारले आरडिटी परीक्षण बन्द गरेको हो । त्यसैगरी पछिल्लो समय धेरै कोरोना संक्रमण फैलिएको वीरगंज र जनकपुरमा समन्वय गर्न स्वास्थ्य सेवा विभागका महानिर्देशक डा. दीपेन्द्र रमण सिंहको नेतृत्वमा उच्चस्तरीय टोली टोली पठाइएको प्रवक्ता गौतमले जानकारी दिएका छन् । गौतमका अनुसार आवश्यकता परेमा अन्य ठाउँमा पनि उच्च स्तरीय टोली पठाइनेछ ।
गौतमले काठमाडौंमा कोरोना संक्रमणबाट जोगिन ६० वर्ष माथिका र १२ वर्ष मुनिका बालबालिकालाई घर बाहिर ननिस्कन आग्रह गरेका छन् । उनले कोरोनाबाट जोगिन सबैलाई स्वास्थ्य सतर्कता अपनाउनसमेत आग्रह गरेका छन् ।
