स्याङ्जामा पहिरोमा पुरिएर एक जनाको मृत्यु, तीन बेपत्ता

स्याङ्जा । स्याङ्जामा पहिरोमा पुरिएर एक जनाको मृत्यु भएको छ । कालीगण्डकी गाउँपालिका– ४ बिर्घास्थित खहरेमा पहिरो जाँदा ७० वर्षीय इमानसिंह रानाको मृत्यु भएको हो । उनी साविकको विर्घा गाउँ विकास समितिका पूर्वअध्यक्ष हुन् । पहिरोमा परेर तीन जना बेपत्ता छन् भने दुई जना घाइते भएका छन् ।

घाइते बिर्घाकै हुमाकान्त पाण्डे र बुद्ध रानालाई उद्धार गरिएको छ भने प्रेमचन्द्र पाण्डे, गिमानसिंह राना र टीका थापा बेपत्ता भएको जिल्ला प्रहरी कार्यालय स्याङ्जाले जनाएको छ । बेपत्ताको खोजी भइरहेको र घाइतेको स्थानीय बिर्घा स्वास्थ्य चौकीमा उपचार भइरहेको छ । गाउँमा खानेपानीको धारामा पानी नआएपछि पानीको मुल मर्मतका लागि पुगेका उनीहरूलाई माथिबाट झरेको पहिरोले पुरेको हो ।