कोरोना संक्रमणबाट थप एक जनाको मृत्यु
काठमाडौं । कोरोना संक्रमणका कारण थप एक जनाको मृत्यु भएको छ । काठमाडौं मेडिकल कलेज सिनामंगलमा उपचाररत काठमाडौंका एक पुरुषको मृत्यु भएको हो । काठमाडौंको गोकर्णका ५४ वर्षका पुरुषको उपचारको क्रममा असार २५ गते मृत्यु भएको थियो । मिर्गौलाका बिरामी उनको पीसीआर परीक्षणमा रिपोर्ट पोजेटिभ आएको हो ।
योसँगै कोरोना संक्रमणका कारण नेपालमा मृत्यु हुनेको संख्या ३६ पुगेको छ । शुक्रबारसम्मको तथ्यांक अनुसार नेपालमा संक्रमितको संख्या १६,६४९ पुगेको छ । त्यस्तै क्वारेन्टाइनमा २३,९१० जना र आइसोलेसनमा ८,६०३ जना रहेका मन्त्रालयले जनाएको छ । अहिलेसम्म डिस्चार्ज हुनेको संख्या ८,०११ पुगेको छ ।
