पूर्वराजा झापाबाट काठमाडौं आउने सवारी पास खारेज

झापा । पूर्वराजा ज्ञानेन्द्र शाह काठमाडौँ आउनका लागि जिल्ला प्रशासन कार्यालय झापाले बिहीबार जारी गरेको सवारी पास केही घण्टामै खारेज गरेको छ । पूर्व राजा शाहका प्रतिनिधि सवारी पास लिनका लागि बिहीबार जिल्ला प्रशासन कार्यालय पुगेका थिए । प्रशासनले तत्कालै सवारी पास जारी गरेको थियो ।

तर त्यसको केही घण्टामै प्रशासनले सवारी पास खारेज गरिएको जानकारी गराएको थियो । गृह मन्त्रालयको आदेशमा झापा जिल्ला प्रशासन कार्यालयले पूर्वराजारानीको सवारी पास रद्द गरेको बताइएको छ । पूर्व राजा र पूर्वरानी शुक्रबार राजधानी आउने कार्यक्रम थियो । पूर्व राजा ज्ञानेन्द्र शाह लकडाउन सुरु हुनुअगावै पत्नी कोमलसहित झापा आएका थिए ।