कोरोनाको बढी संक्रमण देखिएका देशका नागरिकलाई प्रवेशाज्ञा नदिइने
काठमाडौं । सरकारले युरोपेली र मध्यपूर्वका कोरोना भाइरसको बढी संक्रमण देखिएका देशका नागरिकलाई प्रवेशाज्ञा रोक्ने भएको छ । कोरोना भाइरस रोकथाम तथा नियन्त्रण उच्चस्तरीय समन्वय समितिको बिहीबार साँझ बसेको बैठकले यसअघि विभिन्न ५ देशबाट आउने पर्यटकको प्रवेशाज्ञा रोक्ने निर्णय गरेकोमा बिहीबार युरोपेली र मध्यपूर्वका संक्रमित देशहरुबाट समेत प्रवेशाज्ञा रोक्ने निर्णय गरेको हो ।
अर्थमन्त्री डा. युवराज खतिवडाले बढी संक्रमित देशहरुको नाम संकलन भइरहेको जानकारी दिए । तत्काल हवाई उडानहरु कटौती नगर्ने निर्णय पनि बैठकले गरेको छ । बैठकले संक्रमण भइहाले तयारी गर्न स्वास्थ्य मन्त्रालयलाई निर्देशन दिएको छ । क्वारेन्टान सेन्टर, आइसोशेसन कक्ष तथा उपकरणहरुको आपूर्ति बढाउन मन्त्रालयलाई निर्देशन दिइएको उनले बताए ।
त्यसैगरी उपचारमा संलग्न हुने स्वास्थ्यकर्मीहरुको सुरक्षाका लागि उपकरणहरुको आपूर्ति गर्न पनि समितिले भनेको छ । मन्त्री खतिवडाले तत्काल विद्यालय र परीक्षाहरु स्थगित नगर्ने निर्णय गरिएको बताए ।
आवश्यक परेको अवस्थामा नेपाली सेना, नेपाल प्रहरी, सशस्त्र प्रहरीको मेडिकल टिम र मेडिकल कलेज तथा अन्य संघ संस्थाहरुबाट स्वास्थ्यकर्मीहरुलाई परिचालन गर्न तयारी अवस्थामा राख्ने निर्णय पनि बैठकले गरेको छ ।
