अहिलेको उपचार प्रक्रियाबाट निस्केपछि मात्रै प्रधानमन्त्रीको मिर्गाैला प्रत्यारोपणबारे निर्णय हुने
काठमाडौं । नेपाल कम्युनिष्ट पार्टी (नेकपा)ले प्रधानमन्त्री केपी शर्मा ओलीको स्वास्थ्यमा उल्लेखनीय सुधार भएकाले मिर्गाैला प्रत्यारोपण चिकित्सकको सल्लाहमा गर्ने निर्णय गरेको छ ।
पार्टी मुख्यालय धूम्बाराहीमा बुधबार बसेको सचिवालय बैठकले प्रधानमन्त्रीको मिर्गाैलाको डाइलोसिस भइरहेकाले मिर्गौला प्रत्यारोपणबारे चिकित्सकसंग सल्लाह गर्ने निर्णय गरेको नेकपाका प्रवक्ता नारायणकाजी श्रेष्ठले बैठकपछि सञ्चारकर्मीलाई जानकारी दिए ।
मिर्गौलाको आवश्यकता अनुसार डाइलोसिसको प्रक्रिया जारी रहेको छ । यसपछि के गर्ने भन्ने कुरा उपचारको प्रक्रियाबाट निस्केपछि चिकित्सकको परामर्शमा निर्णय लिइने उनले बताए ।
स्वास्थ्यमा समस्या आएपछि प्रधानमन्त्री ओलीको यही मङ्सिर १० गते सोही केन्द्रमा एपेन्डिसाइटिसको शल्यक्रिया गरिएको थियो । प्रधानमन्त्रीले केही दिनअघि अस्पतालबाटै भिडियो सन्देश दिँदै आफ्नो स्वास्थ्यमा सुधार भइरहेको बताएका थिए ।
तर केहीले भने प्रधानमन्त्रीको स्वास्थ्य गम्भीर रहेको तर भिडियो सन्देश दिएर केही नभएको देखाउन खोजिएको भन्दै त्यस कदमको आलोचनासमेत गरेका छन् ।
