नारायणकाजी भन्छन्-अतिक्रमित भूमि फिर्ता ल्याउन एकढिक्का हुनुपर्छ
काठमाडौं । सत्तारुढ दल नेकपाका प्रवक्ता नारायणकाजी श्रेष्ठले नेपालको भूमि फिर्ता ल्याउन सिंगो राष्ट्र एकढिक्का हुनुपर्ने बताएका छन् । बिहीबार बसेको राष्ट्रिय सरोकार तथा समन्वय समितिको बैठकमा श्रेष्ठले इतिहासमा के भयो भन्ने बहस गर्नुभन्दा पनि नेपालको भूमि फिर्ता ल्याउन सिंगो राष्ट्र एकढिक्का हुनुपर्ने बताएका हुन् ।
उनले अहिले नेपालका नेतृत्वहरु पनि गम्भीर भएर भूमि फिर्ताका लागि लाग्नुपर्ने बताए । राजनीतिक परिवर्तनहरुलाई सुदृढ गर्न पनि अहिले राजनीतिकर्मीहरु त्यागको भावनामा अघि बढ्नुपर्ने उनको भनाई थियो । फरक प्रसंगमा उनले विदेशमा अप्ठेरो स्थितिमा रहेकाहरुलाई भने तत्काल फर्काउन सरकारले पहल गर्नुपर्ने बताए ।
बैठकमा समिति सदस्यहरुले अहिलेको संकटका बेला नेपालमा रहेका सांसद लगायत तलवी अधिकृत कर्मचारीहरुको २५ प्रतिशत तलव घटाउनुपर्ने सुझाव दिएका थिए । त्यस्तै कोरोना संक्रमण रोकथाम तथा नियन्त्रणका लागि परीक्षणको दायरा बढाउनुपर्नेमा पनि उनीहरुले जोड दिएका थिए ।
