कोरोना भाइरस चीनको भाइरोलोजी प्रयोगशालाबाट फैलिएको ट्रम्पको दाबी
अमेरिकी राष्ट्रपति डोनाल्ड ट्रम्पले कोरोना भाइरस चीनको भाइरोलोजी प्रयोगशालाबाट फैलिएको दाबी गरेका छन् । बिहीबार ह्वाइटहाउसमा आयोजित पत्रकार सम्मेलनमा उनले कोरोना भाइरस वुहानको प्रयोगशालाबाट फैलिएको हो भन्ने प्रमाण आफूले हेरेको दाबी गरेका हुन् ।
ट्रम्पले भने, “हो मसँग छ र मलाई लाग्छ, विश्व स्वास्थ्य सङ्गठनलाई लाज लाग्नुपर्ने हो किनकि उनीहरू चीनको जनसम्पर्क निकायजस्ता छन्।“ चीनले गल्तीले उक्त भाइरस बनाएको वा कसैले उद्देश्यका साथ यो बनाएको हुन सक्ने उनले बताए । “मलाई थाहा छैन चीनमा कति मानिसहरूलाई हिँडडुल गर्न दिइएन, तर उनीहरू अन्यत्र सबैतिर हिँडिरहेका थिए। त्यो एकदमै खराब हो। त्यो उनीहरूका लागि जवाफ दिन निकै गाह्रो प्रश्न हो,“ ट्रम्पले भने ।
बिहीवार न्यूयोर्क टाइम्सले ह्वाइट हाउसका वरिष्ठ अधिकारीहरूले गुप्तचर निकायलाई उक्त भाइरस वुहानको प्रयोगशालाबाट निस्केको हो वा होइन भन्नेबारे जाँच गर्न निर्देशन दिएको खबर प्रकाशित गरेको थियो । अमेरिकी गुप्तचर समूहहरूले कभिड १९ रोग निम्त्याउने कोरोनाभाइरस मानव निर्मित वा आनुवंशिक रूपमा परिवर्तन गरिएको नभएको निक्र्यौल गरेको छ । नेशनल इन्टेलिजेन्सका प्रमुखको कार्यालयले उक्त भाइरस जनावरको सम्पर्क वा प्रयोगशाला दुर्घटना केबाट सुरु भएको थियो भन्नेबारे निकायहरूले हेरिरहेको जनाएको छ ।
राष्ट्रपति डोनल्ड ट्रम्पले चीनको एउटा प्रयोगशालाबाट भाइरस निस्किएको भनेका थिए । चीनले कोभिड १९ मानव निर्मित हो भन्ने सिद्धान्तको खारेज गरेको छ र अमेरिकी भनाइको आलोचना गरेको छ । ’डाइरेक्टर अफ नेशनल इन्टेलिजेन्स’को कार्यालयले कोभिड १९ को उत्पत्ति प्राकृतिक हो भन्नेबारे “वैज्ञानिकहरूको व्यापक सहमति रहेको“ बताएको छ । उक्त कार्यालयले अमेरिकी गुप्तचर निकायहरूलाई हेर्छ । “सङ्क्रमित जनावरको सम्पर्कमा आएर वा वुहानको एउटा प्रयोगशालाबाट दुर्घटना भएर यो भाइरसको उत्पत्ति भयो भन्ने सुनिश्चित गर्ने गुप्तचर निकायहरूले प्राप्त जानकारी र गुप्तचरी सूचनाका आधारमा परीक्षण गरिरहेका छन्,“ उसले भनेको छ ।
