कोरोना संक्रमणबाट पछिल्लो २४ घण्टामा ७ हजार भन्दा बढीको मृत्यु
विश्वव्यापी रुपमा फैलिएको कोरोना भाइरसको संक्रमणबाट अमेरिकामा मृत्यु हुनेको संख्या दिनदिनै बढ्दै गएको छ । पछिल्लो २४ घण्टामा अमेरिकामा १९ सयको मृत्यु भएको छ ।
योसँगै कोरोना संक्रमणबाट अमेरिकामा मृत्यु हुनेको संख्या १६ हजार ६ सय ९१ पुगेको छ । अमेरिकामा संक्रमित हुनेको संख्या पनि बढेको छ । त्यहाँ ४ लाख ६८ हजार ५ सय ६६ जनामा कोरोना संक्रमण भएको छ । पछिल्लो २४ घण्टामा विश्वमा कोरोना संक्रमणबाट ७ हजार २२५ जनाले ज्यान गुमाएका छन् ।
फ्रान्समा एक हजार ३४१, स्पेनमा ६५५, इटलीमा ६१० तथा जर्मनीमा २५८ जनाले पछिल्लो २४ घण्टामा ज्यान गुमाएका छन् । शुक्रबार बिहानसम्म कोरोनाका कारण विश्वभर ९५ हजार ६८५ जनाले ज्यान गुमाइसकेका छन् भने विश्वभर संक्रमितको संख्या १६ लाख नाघेको छ ।
